“Ua teena le talosaga mo se iloiloga faaletulafono”…Faamasino Sili
Ua lē talia e le Faamasinoga Maualuga a le atunuu se talosaga a se vaega o suli o le suafa Amoa o Samusu i Aleipata ina ia faia se suesuega e toe sailiili ai i se ala faaletulafono poo se judiciary review se tasi o faaiuga a le Faamasinoga o Talosaga Toe Iloilo (Court of Appeal) a le Faamasinoga o Fanua ma Suafa na faia i le tausaga e 2005 e faasino i suli e pulea le suafa Amoa.
O le talosaga a Tiotionu‘u‘ese Atonio Amoa, o Pauli Dr Jerome Amoa ma isi o Togafuafua ma Samusu na talosagaina ai le Faamasinoga Maualuga e iloilo le faaiuga a le Faamasinoga o Talosaga Toe Iloilo a le Faamasinoga o Fanua ma Suafa o le aso 9 o Tesema o le tausaga e 2005.
O le faaiuga lea na faamaonia ai o le Aiga potopoto e iai le pule o le suafa latou te filifilia se nofo poo ni nofo, e iai lea i itu e ono e aofia ai le itu talosaga muamua, itu talosaga lua, itu talosaga tolu, itu talosaga fa, ma itu tetee muamua ma le lua. O le faanofoina o Tone Ponifasio, Sione Tamiano ma Taua‘a Makiasi i le suafa Amoa o Samusu ua soloia ma faalēaogāina.
E iai le isi faaiuga e faasino i lea suafa matai o le atunuu na faia i le aso 21 o Novema o le tausaga e 1994 peitai e lē o le faaiuga lea o loo faasino i ai le talosaga mo se iloiloga faaletulafono.
O Iulai o le tausaga e 2010 na faaulu ai le talosaga mo se iloiloga faaletulafono e faasino i le iuga o Tesema 2005, ae oo mai i le masina o Fepuari o le tausaga nei 2011 faaulu le isi teuteuga o lea lava talosaga.
O le teuteuga lea na talosagaina ai e le itu tagi le soloia o le palakalafa 10 puipui (2) o le faaiuga a le Faamasinoga o Fanua ma Suafa, lea e faasino i le pule o le suafa Amoa ua iai lea i le aiga potopoto ae ia lē aofia ai le itu tetee lona tolu.
Sa faavae lea vaega o le talosaga teuteu i le mau a le itu tagi e faapea ua iai vaega na lē tausisia i le iloiloga a le Faamasinoga Maualalo sa noatia ai le aiā tatau faaletulafono o le itu tagi e tusa ma le vaega 9 o le Faavae ona e faapea, e lei iai se molimau e lagolago ai le iloiloga a le faamasinoga na taunuu ai i le latou faaiuga o le Pule o le suafa Amoa ua iai lea i le aiga potopoto i ona itu e ono e pei ona aiaia i le vaega 10 puipui 2 o le faaiuga.
O lea faaiuga ua afaina ai aiā tatau o le itu tagi e saofaga ai ma agavaa i se suesuega e aunoa ma le aafia o aiā tatau ma faamanuiaga faaletagata soifua e fesootai ma le mataupu sa suesueina e le faamasinoga. E lei mafai e le faamasinoga ona faamanino sootaga o suli e faasino i ai le aiga potopoto ma e lei mafai foi e le faamasinoga ona afea i le latou iloiloga poo ai tonu sa tautua i lē sa umia le suafa Amoa.
O nisi ia o vaega o le talosaga teuteu sa finauina ai se iloiloga faaletulafono. Peitai i le silasila a le Faamasinoga Maualuga i le mataupu, o loo manino mai ai i le palakalafa 4 o le laupepa lona tolu o le faaiuga, e 21 itulau sa faatino ma le toto‘a le suesuega a le faamasinpoga i mau sa tuuina atu e itu sa auai i le faamasinoga o fanua ma suafa sa lauliliu ai le mataupu.
E oo i mau tusitusia na tuuina atu e itu sa auai, sa silasila foi i ai le faamasinoga e aofia ai se mau tusitusia i se tasi o faamasinoga o loo saini ai le suafa o Amoa Tausilia sa seei i le suafa.
O le silasila foi a le Faamasinoga Maualuga i le faaiuga o loo faailoa mai e le faamasinoga le lavelave o mau na tuuina atu e itu aemaise le lavelave o gafa na tuuina atu, ma o se itu faigata lea i le faamasinoga.
E oo lava i mau na tuuina atu e itu sa auai, o loo faaalia i le faaiuga le lē atoatoa o ia mau poo evidence. Talu ai le lē mautonu o le faamasinoga poo ai tonu suli e tau i le suafa ma suli moni o loo faaalia i le palakalafa 5 o le faaiuga a le Faamasinoga Maualalo i le laupepa lona ono, o lea na taunuu ai le faamasinoga i le tuuina atu o le pule i le aiga potopoto.
O se faaiuga na faavae i le iloiloga e fua i mau na tuuina atu. O le faaiuga a le afioga i le Faamasino Sili, Patu Tiavaasu‘e Falefatu Sapolu, i le talosaga mo se iloiloga faaletulafono na fofogaina i le aso 18 o Aukuso 2011, o loo ia faaalia ai o le pule o se suafa e faasino lea i suli.
O lona lea silafia i tausaga e 13 sa ia tauaveina ai le tofiga Peresitene o le Faamasinoga o Fanua ma Suafa. O suli ia e aofia ai suli moni, suli tamafai ma suli tautua.
O suli moni e faasino ia i latou o totino moni o le suafa, o suli tamafai o suli sa vaetamaina e nisi o suli moni, ma suli tautua o i latou e leai se piitaga ae o le latou tautua ua mafai ai ona amanaia.
O le silasila a le Faamasinoga Maualuga o i latou uma ua faasino i ai le faaiuga o le aso 5 o Tesema 2005 o latou moni ia e aofia i le aiga potopoto ua iai ma le pule i le filifiliga o se nofo poo ni nofo i le suafa Amoa.
Ua faamautu ai e le Faamasinoga Maualuga le faaiuga a le Faamasinoga o Talosaga Toe Iloilo a le Faamasinoga o Fanua ma Suafa, ma ua lē talia ai le toe faia o se isi iloiloga faaletulafono.
