Fesuia‘i tofiga a le faasinoti Ekalesia Metotisi a Kuiniselani

E pei ona silafia le faagasologa o le aufaigaluega galulue a le Ekalesia Metotisi, e ta‘i 7 tausaga ma fesuiai.
O le Aso Toonai, aso 27 o Iulai na faia ai le faamavaega a le faasinoti Ekalesia Metotisi a Kuiniselani ma le afioga i le Sea ia Rev So‘afa ma Logotaeao Mulipola
E pei ona mautinoa o le a penisione malolo i o la tiute, aemaise o nisi o tausi matagaluega o le a tuua le faasinoti a Kuinsiselani.
O le susuga ia Rev Siologa & Atonia Mapuilesua o le a siitia atu ma galulue i Falelauniu i Samoa, ae o Rev Fereti & Mua‘ina Vaalepu o le a galulue i Canberra.
Ua misia foi e le Sinoti le mafutaga ma auauna a le Atua ma aiga o le a toesea. O se mafutaga faagalogata ma ua mafanafana foi le mafutaga, ae faamalo le galulue ma le tauivi i le galuega a le Matai, faapea foi Rev Siologa & Atonia, Rev Fereti foi ma Mua‘ina ia a laua aulotu fou.
O le aoauli o le Aso Sa, 28 o Iulai na faia ai le faamavaega a le afioga i le Sea ma lana ekalesia i Bundamba ona o le a malaga ese atu e faia le la faamalologa ma aumau i Sini i nisi o le nofoaalo, ae o nisi o Algester ma Browns Plains o le a faataunuuina faamavaega ma tausi matagaluega i le weekend muamua o Aukuso.
O le aso 10 o Aukuso ua fuafua o le a feiloai ai le Faasinoti a Kuiniselani ma le susuga ia Rev Alefoti ma le faletua ia Seuoletoi Seloti, ua tusiaao i ai le Atua e avea ma Sea o le faasinoti Ekalesia Metotisi a Kuiniselani.
O le a galulue foi i le matagaluega a Bundamba ae sa galulue i le Sinoti a Sini. O nisi o tausi matagaluega o le a siitia mai i Brisbane, e aofia ai le susuga ia Lei‘o & Pesio Leilua o le a galulue i Akesa faapea Pene ma Lily e galulue i Browns Plains.
E avea foi lenei avanoa e momoli atu ai alofaaga mo lau susuga Rev So‘afa ma le faletua ia Logotaeao Mulipola. Faafetai tele i taimi sa tatou mafuta ai aemaise o le talileleia o le tusitala pe a fesootai atu i vaega fia faalauiloa.
O alofaaga foi mo le susuga ia Rev Siologa & Atonia faapea Rev Fereti & Mua‘ina, tau ina ia faamanuia le Atua ia tou  galuega fou ma ia saga faamanuia pea le Atua.
O le faafetai faapitoa mo le susuga ia Rev James Matamua o lē sa avea ma failautusi o le faasinoti e ala i le fesootaiga i ripoti tuuina mai, faafetai tele James Matamua.
Ia sagai ane ‘ai o le tai i lau susuga Rev Tavita ma Faaleava Faatoe o le a tulai mai e avea ma failautusi o le Sinoti. E talitonu o le a tatou feiloai pea e ala i la tatou galuega soosoo tau‘au. Tau ia agalelei pea le Atua i tiute ma faiva o le galuega a le Matai o loo valaauina ai lo outou soifua.