E tasi le miliona ma le tolu selau afe (1.3 miliona) le vaegatupe o le fesoasoani mai le Malo o le Iunaite Setete o Amerika o le a maua e le polokalame fesoasoani a le Ekalesia Aso Fitu o le Toe Afio Mai i Samoa e ta‘ua o le ADRA (Adventist Development Relief Agency). O le polokalame lenei a lea ekalesia o loo aofia ai atunuu uma o le lalolagi.
O le fausia o nisi o fale o aiga na faaleagaina i le afā o Eveni ia Tesema o le tausaga e 2012, faapea fale na fausia mo nisi o aiga na afaina i le malosi o le sunami i a Setema o le tausaga e 2009, o nisi ia o galuega laveai na faia e le ADRA i Samoa lata mai nei.
O suiga o le tau ma ona aafiaga i nisi o aiga ma tagata i Samoa o le autu lea o polokalame fesoasoani a le ADRA ua taulai nei i ai lea o le a alu tonu i ai le foai tupe tele mai le Malo o Amerika na faamautu i se sauniga na faia i le nofoaga tutotonu o le Ekalesia Aso Fitu o le Toe Afio Mai i Lalovaea i le faaiuga o le vaiaso ua mavae.
E lē gata ina taulai fesoasoani i aafiaga o suiga o le tau ae o se isi foai faaopoopo a le Malo o Amerika e $250,000 o le a tuuina atu lea mo le galuega faatusitala ma faasalalau mo le faatupeina o galuega e lipotia ai aafiaga o tagata mai suiga o le tau.
O faatoaga o le tasi lea o aafiaga tele mai suiga o le tau faapea le lofia o nofoaga maualalalo tu lata ile sami ona o le siitia o le sua tai poo le sami o nisi ia o vaega o loo mataitu i galuega fesoasoani a le ADRA. Na faaalia e le alii Amepasa o Amerika mo Samoa o Mark Gilbert, o le sasaa mai o le fesoasoani a lona Malo o se faailoga o le fia soosoo tau‘au ma atunuu e pei o Samoa o loo lamatia tele i suiga o le tau. O le faafetai lea a le sui Palemia le tofa Fonotoe Nuafesili Pierre Lauofo Meredith.
Na saunoa le afioga i le sui Palemia ma ia faailoa pe ana lē seanoa le agalelei mai o atunuu o loo faipaaga ma Samoa e lē mafai e le Malo ona faatino nisi o ana fuafuaga e tali atu ai i manaoga o le atunuu ona o aafiaga mai suiga o le tau.
O le afioaga o Faleaseela i Lefaga na malaga i ai le Amepasa ma lana aumalaga mai Niu Sila i le ofisa o le Amepasa o loo i Ueligitone mo le molimauina o se faataitaiga sa faia ai e fasaga tonu i tapenaga i taimi e tulai mai ai se sunami.
Tasi lea o tapenaga sili ona tāua mo nuu ma afioaga uma i Samoa ona tasi lea o mala faalenatura e mafua mai i suiga o le tau.
