Tusia: Merita Huch
Samoa
O le toatele o i latou sa i le fono a le ABU (Iuni a Ofisa Faasalalau a Asia) i le Sheraton i le motu o Denarau i Nadi, Fiti i le vaiaso na tuanai nei na talanoaina le sao ma le tiute ua fesootai ma ofisa faasalalau a malo taitasi o le itulagi.
O le vaega lenei o le sailiga aoao tetele poo le ā tonu lava le tulaga o iai le atinae ma le agai i luma o ofisa faasalalau i lenei itulagi aemaise o ofisa ia o loo i lalo o le pulega a faigamalo.
Mo Samoa o loo iai le Ofisa faasalalau poo le leitio a le 2AP. O isi atunuu e pei o Niu Sila ma Ausetalia o loo iai foi leitio aemaise o televise.
O sui o Samoa sa i lea vaega o faatalatalanoaga o le afioga Galumalemana Faiesea Lei-Sam Matafeo o lē sa faauluulu i ai le Televise Samoa lea na mulimuli tuufaatasi ma le leitio 2AP ma ia pulea uma ai ia ofisa faasalalau i lalo o le igoa o le Samoa Broadcasting Corporation poo le Faalapotopotoga o Faasalalauga a Samoa.
Na mulimuli ane faatau e le malo le Televise lea ua pulea ai nei e se Fono a ni au fai sea a le atunuu ma ua suia ai nei i se kamupani ae o Galumalemana lava lea o loo pulea lea kamupani tuma‘oti.
Sa aofia ai foi i le usugafono lea le afioga Letoa Matini o ia lea o le Ofisa Sili Lagolago ua patino lana auaunaga i le leitio o le 2AP.
O le faiga lava sa sau a‘i le Ofisa faasalalau lenei o loo pulea e le Malo i lalo o le Matagaluega o Fesootaiga ma Faamatalaga aemaise o fesootaiga televavave faaonapo nei, (MCIT) ma o le taulai o lana auaunaga o le faasalalau lea o le tele o galuega a le Malo ma ua faapea ona aofia ai ma le faasalalauina o le fono a le Palemene aemaise ana lava polokalame ua faataatia.
O le leo lea o le Malo i ana atinae aemaise foi i taimi o faalavelave faafuasei. E iai le eseesega o ofisa faasalalau nei a le malo e pei ona maua i lenei fonotaga. E pei foi ona faaali e faauluuluga o nei ofisa i le fono tele lea i Nadi.
O le Televise a Niu Sila ma le leitio faapea le Televise a Ausetalia ua manino o le tele o lana tupe o loo maua e sau mai i le malo o Ausetalia aemaise foi le Malo o Niu Sila, peitai e lē aiāina e faigamalo galuega faatusitala aemaise lava i Talafou ona o le manatu o le vaega lea ua i lalo o taiala faatusitala ma faasalalauga, e tuu atu ia i latou ua nafa ma lea galuega ae o loo faaauau lava ona faatupe e faigamalo nei.
O Niu Sila na ta‘ua e le sui o le Televise a Niu Sila, ua tuu atu le faatamo‘ega o lea televise ia faia o se pisinisi ma ua tele polokalame ua aveese ona o le itu lea e lē lava le tupe e sau i totonu e faatino ai nisi o polokalame sa mafai ona faatino ona o le fesoasoani a le Malo ae talu ona faatamo‘e o se pisinisi a le malo, o lea la ua agai ai i auala e tuuitiitia ai le tupe alu ae ia faaauau ona tautua i lea atunuu.
O Ausetalia na ta‘ua e se sui o le ABC poo le faalapotopotoga o Faasalalauga a Ausetalia o Jemima Garret, ua tele ina vāea tagata faigaluega ona o le tau faasoasoa foi o le tupe ae o le matafaioi faatusitala o lea ofisa faasalalau ua mautu ai lava le faatino o galuega i lea itu o faasalalauga e aunoa ma le aiāina e le Malo.
Mo isi atumotu o le Pasefika e pei o Vanuatu na ta‘ua ai e le taitaifono o le Komiti Faafoe o loo pulea lea televise ma le leitio a le Malo, o le tele lava o a latou galuega e faamoemoe i le faigamalo o lea taimi ma lea taimi ma o le tele o a latou fuafuaga na ia ta‘ua, e lē taunuu auā o le sui lava o le malo, sui atoa foi le pulega o le televise ma le leitio.
Mo le tele o atumotu laiti o le Pasefika e aofia ai Samoa ua molimauina ai o galuega faa faasalalau mo ofisa faasalalau ia a le Malo, o loo manino ai o le Malo e ana ofisa nei, o le leo foi o le Malo lea e faatinoa le filifiliga i polokalame poo ā foi faamatalaga e tatau ona alu i luga o le ea.
O le unai i lea fonotaga o le taumafai lea o ofisa faasalalau nei ina ia mulimulitai le talitonuga lea e faaauau ai ofisa faasalalau a Niu Sila ma Ausetalia, tusa lava poo ofisa faasalalau a le Malo e tatau ona amanaia le leo o ofisa nei o ni tautua e tutoatasi mai i finagalo o le Malo.
O le itu tau i mea faigaluega o lea ua unai e le Iuni o Ofisa Faasalalau a Asia (ma le Pasefika) fesootaiga ma nei ofisa o le itulagi mo ia ituaiga fesoasoani ina ia faaitiitia ai le faalagoalago i le malo mo ia atinae ma tuuitiitia ai o le faapea ane, o ofisa nei o fofoga o lea malo ma lea malo ae ua lē tutoatasi.
