“Ua sulu mai le tama i le matou faalapotopotoga mo se sailiiliga”…Lina Chang
Na mafua ona nofo taofia ona ua leai se nofoaga i le falemai mo tagata e aafia i le gasegase o le mafaufau. O le faamatalaga lea a lona tamāa. “O si ou atalii e iai le gasegase o le mafaufau e aafia ai ma ua masani ai la‘u fanau”.
Na faamatala le tamā (taofia le suafa) sa logo i leoleo e se tasi o lona aiga le faaoolima a lona atalii i se tasi o lana fanau, le mafuaaga na aumai ai i le ofisa o leoleo ma ave i le falemai mo le faia o sona togafitiga.
Peitai ina ua mae‘a ona faia lea tulaga na faatonuina ai e ave e taofia i le falepuipui i Tafaigata i lalo o le vaavaaiga a leoleo.
E lata i le lua vaiaso o nofo taofia Perry e pei ona faamatala lona tamā, ae logo atu loa le maliu o lona atalii ma le faaupuga na pule i le ola.
“O se tasi o lo‘u aiga na ia logo atu a‘u, ae e lei alu atu se leoleo e logo ma‘ua o matua”.
Na faamatala le tamā o Perry e faapea, na faia se taotoga o lona atalii e sailia ai le pogai o lona maliu, peitai e ui ina faapea atu leoleo na pule i le ola ae e lei silasila i se lipoti e manino ai lea tulaga, pe ua oo atu foi leoleo e latou te faafesagai ma logo atu le taunuuga o le suesuega.
O loo manatua e le tamā o Perry o se fomai mai Ausetalia na faia le taotoga.
“Ua tatou iloa uma vaaiga o se tagata e pule i le ola pe afai na sisi, ae o si ou atalii e leai ni vaaiga faapea, ae na o ona foliga ua solouli uma”.
Na faaalia lava e le tamā o le tulaga tonu lea e faavae ai ona lagona e lei pule lona atalii i le ola, ae o se isi mafuaaga na maliu ai.
O lana sailiga ua tuusao i le Toomaga mo e Puapuagatia mo se fesoasoani, e faavae i ni molimau ua oo atu ia te ia, ua ta‘ua ai o lona atalii na fasi e ni pagota o le falepuipui.
“O le molimau lena a se tasi o leoleo e lei iai i le taimi na tupu ai le faalavelave, ae o lana sifi na sosoo tonu ma le mea na tupu lea sa ia faamatala mai e faapea o tala o loo salalau i le toese o lou atalii na faaoolima i ai ni pagota se toalua”.
“O lea ua oo mai le mataupu ma o loo faia i ai a matou sailiiliga, ma o le faamatalaga a si tamaloa e talu ona maliu lona atalii e le o maua sana moe lelei i le mafatia tele”.
O le finagalo lea o le Peresitene o le Toomaga mo e Puapuagatia le faletua o Lina Chang, ina ua fesiligia i le mataupu.
“O le auaunaga lava ia o le fia fesoasoani mo tagata e fia maua se tali i o latou faafitauli, ae e le fou ni mataupu faapenei e oo mai”.
Sa saili se finagalo o le sooupu o le Matagaluega o leoleo ma falepuipui mo se faamatalaga, ma faaalia ai e le afioga Leaupepe Fatu Pula, o le a sailiili i le mataupu ona e lei oo atu.
Ua ia faamaonia e sa‘o sa iai se alii sa taofia i le falepuipui na maliu ina ua pule i lona ola.
Sa faailoa i le sooupu e le o talitonuina lea tulaga e le tamā o le tama talavou ua maliu, ae sa ia faapea mai o le a silasila i ai.
O le a tuli tatao pea le fia maua o se faamatalaga mai leoleo pe a oo ina taunuu i ai. O le aso 17 o Novema 2011 na maliu ai Perry Tuilaepa 21 tausaga le matua, ma o lona aiga i Vailele o loo lagomau ai.
