Ua masani le faalogo i se muagagana taatele a le atunuu, ‘O le atunuu e te alu i ai faataitai i tu ma aga ma meaai a lena atunuu’.
Atonu o le autu lea o se suiga ua faalauiloa e le pulega o le faletalimalo o le Sinalei i Siumu, e pei ona lipotia ai e faapea, o le tele o taumafa o loo maua i Samoa ua faaaoga mo le tausiga o tagata tafafao o loo mapu ma faamautu i lea faletalimalo.
O ia taumafa e aofia ai talo, fa‘i ma ‘ulu, e sui ai le alaisa ma le pateta, sei vagana ua talosaga faapitoa le turisi i ia taumafa. Faaalia e le tamaitai ua ua pulea le faleaiga o le Sinalei, o se suiga lelei lea e unaia ai tagata mai fafo e tofo ma tausasami i meaai o loo maua i Samoa, ma e alumia ai foi ma taulia taumafa o loo maua i le atunuu.
Ua faaopoopo i taumafa tau faatoaga o loo faaaoga e lea faletalimalo, taumafa masani a le atunuu mai le sami e pei o i‘a ma figota ma fualaau aina suamalie ma fualaau taumafa mata o loo toto ma ola i Samoa.
