“E iai se aiā tatau saoloto o fautasi e o ai i tuuga foe sipuni toe alu i tuuga e faaaogā ai foe laau”, Ai‘i Vavao
O le Aso Lua o le vaiaso nei e toe fono ai kapeteni o fautasi ma le Komesina o leoleo e faamautu vaega mulimuli o tapenaga o faagatama i le tai mo le faamanatuina o le Tutoatasi.
Ua mautinoa e lua lava tuuga o le a faia, o tuuga fautasi faavaomalo e faaaogā ai foe sipuni, ma tuuga fautasi i le aloalo e faaaogā ai foe Samoa poo foe e gaosi mai laau o le vao lea ua ta‘ua foi o foe laupapa.
E le o logo mālie i le tofa Ai‘i Vavao le Pulenuu o Lepea o loo lotolotoi i le tapenaina o le fautasi o lo latou nuu le La o Samoa aiaiga o tuuga o lenei tausaga.
Na faaalia manino e Ai‘i i le fono a kapeteni ma le Komesina o leoleo i le Aso Lulu na tea nei, 19 o Me 2010, pe aisea ua lua ai tuuga ma faaeseese fautasi e alo i foe sipuni ma fautasi e alo i foe laupapa.
Ua fesiligia foi e le sui lea o le La o Samoa, pe aisea ua lē mafai ai ona tausinio i le isi tuuga ona toe o mai lea tauva i le isi tuuga.
“O lau fesili lau afioga, pe iai se aiā tatau a matou e ana fautasi e faia ai faaiuga auā e foliga mai ua pule toatasi mai e le Malo le faiga o nei mea”, o le fesili tuusa‘o a Ai‘i i le Komesina o leoleo.
O loo manao le La o Samoa e fia tauva uma i tuuga fautasi foe sipuni ma fautasi foe laau.
Peitai na faaalia manino e le taitaifono o le Komiti autū a le Malo e faia le faaiuga ma o le iuga lava lea ua mautu e le toe suia, o le fautasi lava e alu i le foe sipuni e le mafai na toe alu i le tuuga a fautasi e alo i foe laupapa.
O le isi tulaga na fesiligia e Ai‘i pe aisea ua eseese ai faailogatupe e pei ona maua e le fautasi e manumalo i le tuuga faavaomalo lea e faaaogā ai foe sipuni le $25,000 ae o le fautasi e mua i foe laupapa e $22,000.
Na faamalamalama e le taitaifono, o faailogatupe lava ia ua mautu i le faaiuga a le Komiti tele ma e le toe mafai e le latou komiti se isi suiga ae o le a ave pea se isi talosaga pe faamata e toe suia ai le aofaiga o faailogatupe.
Na faamalamalama foi e le taitaifono o loo naunau le Malo e faatosina mai fautasi foe sipuni a Tutuila ma Manu‘a le mafuaaga o le faaeseese o tuuga fautasi, ma e foliga mai ai o loo silasila mamao le Malo i le avea o tuuga fautasi ma se isi taaloga e tausinio ai ni fautasi o isi atunuu e pei o Tonga pe afai e oo ina tosina mai i se taumafaiga e siitia ai le tulaga o lea foi faagatama.
O nisi o afioaga ua ofi atu i tuuga fautasi o le faamanatuina o le Fu‘a o Magiagi lea ua faaigoaina lo latou fautasi o Le Lupe faapea ma le afioaga o Leauvaa ua faaigoa lo latou fautasi o le Tama o le Lava.
E le o mautinoa pe malaga mai le Satani, le isi fautasi o Tutuila ma Manu‘a ae ua mautinoa e masii mai le Aeto mai Pago Pago.
Ua faamautu mai foi e le Komiti le lava tapena ma saunia o vaega uma mo le saogalemu o auvaa taitasi o le a auai i tuuga e faaaogā ai foe sipuni lea e lei mautu pe sau sa‘o mai gatai atu o le uafu tele i Apia, pe sau mai Laulii ma agai mai ai i le taulaga o Apia i le vaega e tini i ai tuuga.
O tuuga fautasi foe sipuni o le a muamua i le 6 poo le ‘afa o le 6 i le taeao, ona sosoo ai lea ma tuuga fautasi foe laupapa i le ta o le 9am.
