Talu ona amata mai le galuega atiae a le Faalapotopotoga o Atinae a le Pasefika le SPBD i le tausaga e 2002, ua oo atu nei le fesoasoani a lenei faalapotopotoga mo tina faipisinisi laiti o Samoa i le $30 miliona tala.
O tina e toalua mai i le atu Vaimauga na atoa i ai lea aofai o le seleni ua faasafua atu i tina o Samoa.
O se atinae lenei na amata mai e se alii faipisinisi mai i Amerika ua tele atunuu ua ia faatuina ai lenei fesoasoani ua nonō atu ai tinoitupe laiti i tina e mafai ai ona saili atinae e maua ai se tupe maua mo aiga i vaiaso taitasi.
O ia fesoasoani e amata mai i le $500 le tupe e mafai ona nonō e tina. A mae‘a le nonogatupe ma ua ao foi totogi o ia nonogatupe muamua, ona faaopoopo lea o le tupe maua.
E tatau ona iai se tina e talosaga i nei fesoasoani i totonu o ni faalapotopotoga e amata atu i le toalima le aofai seia oo lava i le 30 le aofai.
O se tasi lenei o atinae aupito i lelei le faatinoga i totonu o Samoa ma e i lalo ifo o le tasi le pasene (1%) le aofai o ona tagata e lei mafai ona toe totogi a latou aitalafu.
O le mafuaaga tele lava ona e agai lava sui o le SPBD e ao i aso e atofaina totogi o nonogatupe a tina ma vaavaai i le tulaga ua oo i ai a latou atinae. O le toatele ua gaosi ai taumafa faatau e pei o pani penu, o chips e gaosi i le fa‘i, talo ma le ulu.
O isi ua faatutū ai a latou maketi e faatau ai fua o faaeleeleaga, o nisi tina ua faatautaia a latou lafu manu ma ua oo i le $5000 le aofai o nonogatupe ua mafai ona faamatuu i ai, o nisi foi ua sili atu.
O le atoaga o le $20 miliona tala i le lua tausaga talu ai, na faaalia ai e le Afioga i le Sui Palemia le Afioga Misa Telefoni le maualuga o lenei foai ua mafai ona maua e tina e silia i le to‘a 10,000 o Samoa ma o lea $20 miliona na mafai ona faasafua atu i totonu o le ono (6) tausaga.
Ae o lea ua manino e $10 miliona lava ua mafai ona faasafua atu i totonu o le lua tausaga. O se siitaga lea ua manino ai le malosi o le atinae lenei i totonu o le atunuu.
O le faafetai a le alii Sui Palemia ona o le mafai ona talitonuina pea lenei auala o nonogatupe ma lona totogiina, ua mafai ai ona faaauau lenei fesoasoani i tina e le o iai ni galuega totogi vaiaso pe lua vaiaso foi ma e le o mafai ona fai ni nonogatupe i faletupe tutotonu.
O le faaaliga a le alii Amerika o Gregory Cassagrande – o Samoa le isi atunuu ua manino le faatuatuaina o ona tina i le faatinoga o nei atinae aemaise o le toe totogiina o ia seleni, ma o le faamoemoe ina ia mafai ai lava ona faaauau nei atinae ma aveesea ai le le tagolima o le toatele.
O le atoa ai o le $30 miliona tala ua nono atu i tina o Samoa ua faamautu ai ma se isi fesoasoani a le SPBD. O lea fesoasoani ua tatala ai ma le avanoa e totogi ai e tina ni inisiua auā lo latou soifua.
E oo atu i le $5000 le maualuga o lea inisiua ma e pule lava le tina i le tupe e mafai ona totogi lea e amata mai i le $5-$10 i le masina ma o le faamoemoe a tulai mai ni tulaga e maliu ai se tina o loo fai ma sui o lenei polokalame, o le a mafai ona maua lea fesoasoani tau tupe mo toe sauniga o lea tina.
O se avanoa o loo tatala i sui uma o lenei polokalame ma e lē o faamalosia foi.
