Fesili – O a‘u lea ua tofia e vaaia mea tau tupe a si a matou ekalesia. Ua uma le iugafono a le ekalesia o le a amata ona fai le totogi o le faifeau. Ua malilie foi le aulotu e lelei lava le totogi o le lafoga a le faifeau, e matagā le solomua i aulotu ona soli le tulafono. Sau fesoasoani i le faatinoina o lenei tulaga?
Tali – E muamua ona faamautu le aofai o le totogi, e fuafua i ai le lafoga e toese. Tatau ona lesitala le ekalesia, o ia o le fale faigaluega, e faigaluega ai le susuga i le faafeagaiga. E uma loa ona lesitala, e otometi lava ona lafo mai e le Ofisa pepa IR345 i masina taitasi e faatumu ma totogi atu ai le lafoga. Ave le pepa IR330 tax declaration code i le faifeau na te faatumuina, e tusi mai ai lana numera lafoga, ma lana tax code. Faaaogā tax tables e fetaui ma le masina lea e fai ai le totogi, e fuafua i ai le aofai o le lafoga e toese. O le lafoga na toese mai i le totogi o Novema, e faato‘ā tapa mai i ai le ofisa e totogi atu i le aso 20 o Tesema. A tuai ona totogi e lē gata ina faasala, ae toe fafa mai ai ma le pasene tului.
Fesili – Maua se faamatalaga faapea e mafai ona matou tāpaina le lafoga a le faifeau i le matou GST mo se refund.
Tali – O le totogi o le faifeau, e aofia ai ma lana lafoga, e lē lavea i le siosiomaga o le GST. E lē mafai foi la ona maua ai se refund.
Fesili – A o le tele ia o tupe a isi aulotu la e maua mai i le latou GST. Fai mai e tapa uma lava tupe alu, e aofia ai le totogi o le faifeau, meaalofa tupe e alu i maliu, ma le totogiina o le latou nonogatupe mo le falesa. E faila lava e latou le latou GST, lafo pepa i le Ofisa, ma alu sa‘o le latou refund i le latou tusi tupe.
Tali – O tupe alu uma e pei ona e ta‘ua, e misi atoa e lē lavea i lalo o le faamalu o le GST. Ae tagai lelei i pepa na e faaaogā e faila ai le GST, e manaomia le tautoga ma saini le suafa o lē na faatumuina pepa, e sa‘o ma faamaoni e tusa ai ma lona silafia, faamatalaga uma o i luga o pepa. E lē suesueina e le Ofisa o lafoga nei pepa, se‘i vaganā ua iai so latou masalosaloga e sese faamatalaga o loo i luga o pepa. E pule foi le Ofisa poo ai e suesue, ma faatonu mai e avatu uma api. A uma nei suesuega ae faamaonia, ua faatamala sui o le aulotu i le failaina o le GST, e ono faatonu mai e toe totogi uma atu refund na sa maua, atoa ai ma se faasalaga tupe, ona o le fai pogisa, ae lē saili lelei se isi agavaa na te failaina le lafoga.
