O le tiute o le le loia i se mataupu faavave e fia maua ai se faamasino e faia se faaiuga

E lua tiute e tāua i le galuega a le loia.  Muamua o le tiute o le loia i le fale faamasino (laywer is an officer of the Court).  Lona lua o le tiute o le loia i lana client.

I le fale faamasino i Niu Sila, a fai o se mea ua tulai mai ua fia maua ai se faaiuga vave a le fale faamasino, ae ua lē lava le taimi e fai ai pepa o talosaga masani i le fale faamasino, e mafai e le loia ona faafesootai vave le fale faamasino ma logo i le lesitala, e iai se mataupu vave e fia maua ai se faamasino, ae ua lē lava le taimi e tapena ai pepa talosaga pei ona faatapulaa mai i tulafono a le fale faamasino ma tulafono e fai ai galuega faaloia.

Afai o le isi itu o le malo lea e faasaga i ai se tagi, o le loia e logo vave le ofisa loia a le malo ona logo i ai le mataupu e faasaga i le malo lea e fia ave vave i le fale faamasino.  Ona feutagai lea o le loia a le malo ma le loia a le tagata lea e fia maua vave se faaiuga a le faamasino.

E mafai i le fale faamasino ona talia se undertaking (poo se tuutuuga) a le loia a le client lea fia vave maua se faamasinoga, ae faila mulimuli atu pepa. O le tuutuuga e faila mulimuli pepa pe a uma ona ave le mataupu i luma o se faamasino e iloilo ai.

Ua ou faia se fesoasoani faapenei mo se teine mai Thailand, sa loka sese e Niu Sila ma toe tau faafoi i se vaalele.

A lē faia tiute o loia i mea vave faapenei, e mafai e le client ona ave se tagi i le tulafono e faasino i le loia.

O le teine mai Thailand lea e ta‘ua sa loka sese e leoleo i Aukilani ina ua ulu mai i le malaevaalele e sau e asi lona aiga i Onehunga. Sa ou maua i le taeao i le 9:00 se talosaga faatopetope mai a le papalagi e nofo i le tei o le teine lea ua loka e leoleo. Na vili lea papalagi i se leoleo papalagi ua litaea mo se fesoasoani, ma sa fautua i ai e vili mai a‘u i se fosoasoani vave.

Na oo mai le aiga o le fafine lea e loka i lo‘u ofisa ua 9:30 ae fai mai o la ua ta‘u atu e leoleo Niu Sila o le teine o le a toe faafoi i le vaalele e alu ese i le 12:00 i le aso lava lea i Thailand, ona e lē talitonu Niu Sila o le teine e sau e tafao.

E uma le talanoaga ma le aiga o le a ta le 10:00. O‘u iloa e lē taitai lava le taimi e tusi ai ni Application mo le fale faamasino, e alu le vaalele e lei uma ona faila pepa masani i le fale faamasino.

Sa ou vili le lesitala o le fale faamasino ma logo i ai e iai lava Urgent injunction e fia ave atu i luma o se faamasino ae lei ta le 11:00.  Na ou fai i ai o le 11:00 ona i ave atopau a le teine i le vaalele pe a tuai la‘u gaoioi.

Sa ou vili le Crown Law office (loia a le malo a Niu Sila) i Aukilani. Sa ou talanoa ma le loia a le malo. Na ou ta‘uina i ai e iai la‘u apalai faavave e fia fai i luma o se faamasino i le High Court, e taofi la‘u client a o lei alu le vaalele lea e alu i le aoauli i le 12:00 i Thailand. Sa tali fesoasoani mai le loia a le malo ma fai mai a ou sauni loa ua maua la‘u faamasino ona logo atu loa lea o ia e sau i le fale faamasino (High Court) ona ma fetaui loa lea e fai le case i luma o le faamasino.

Sa ou toe vili le lesitala o le fale faamasino (High Court) o lea ua malie mai le loia a le malo (Crown Law) ma o lea ua ou sauni ou te alu atu i le High Court ona ua vave tele le taimi.

Na fai mai le lesitala e lē mafai ona fai le mea ou te manao ai ona o faamasino uma o la e i le latou fonotaga i Rotorua, ma e leai se faamasino o iai i le High Court i le aso lena. Sa ou fai i ai pe ā pe a fai i le telefoni la‘u talosaga, leaga i alu le vaalele ae lei maua se faamasino, ona ave lea o si teine lea ua ou iloa ua loka sese e leoleo.

Sa faapena loa ona sue e le lesitala se faamasino i Rotorua, ma maua le faamasino ua malie mai e fai le faamasinoga e ia i luga o le telefoni.

Na fai le faamasinoga i luga o le telefoni. O le faamasino mai Rotorua, o le loia a le malo i Aukilani ma a‘u atu i Aukilani. Sa ou malo ma maua mai la‘u interim Injunction e taofi ai le aveeseina o lea teine.  Sa ave loa le telefoni a le loia a le malo i le Immigration ma leoleo e tatala i tua le teine ma aumai i tua ana atopau mai le vaalele lea e alu i Thailand i le 12pm.

Na ou malo ina ua fai aloaia le case a lea teine i luma o se faamasino na ia aiaia mautu le tagi a le teine Thailand, i le High Court a Aukilani. E ova i le NZ$80,000 le tupe na award i le High Court i Aukilani mo le loka seseina o lea teine.  Sa oo i le Court of Appeal lea case, ona ua tagi le malo o Niu Sila ua telē tele lea tupe ua fai mai le High Court a Aukilani e ave i lea teine Thailand. Sa toe tipi e le Court of Appeal le award, ae ui ua toe tipi i lalo le tupe, sa maua lava le tupe a lenei teine na foi ma ia i Thailand.

Ua ta‘ua lea case ia silafia ai (1) a tāua se mea e tupu e fai mai ai se order a le fale faamasino, e tusa pe leai ni pepa faaloia, e maua le avanoa i luma o le faamasino.

“Justice must not only be done, but seen to be done”.

O tiute o loia e lē mafai ona faatino pe a lē faia tiute o tagata galulue i totonu o fale faamasino. E malamalama lava faamasino i le tāua o le fai o le avanoa, e tusa pe lē o i Aukilani, ma feagai ma ni fonotaga e faaavanoa le taimi e fai ai o latou tiute, auā le puipuia o aiā tatau o tagata uma i le tulafono.