Fesili – Na sii mai le matou ekalesia i le maliu o si o‘u toalua. Na matou teuina le ekalesia e tusa ai foi ma le aganuu i palapala malo, lalaga atoa ma le meaalofa tino i tupe e $5000. E mafai ona maua sa‘u refund i le $5000 lea?
Tali – E maua lau refund pe a mafai ona e faamalieina itu nei o le tulafono:
• O le $5000 na e foai fua i le tou ekalesia e aunoa ma se taui na maua mai ai mo oe poo le tou aiga.
• Ua uma ona lesitala le tou ekalesia i le komisi a le malo (charities commission) ma o loo mamalu pea lenei lesitala.
• E iai sau lisiti mai le ekalesia o loo tusi ai le aso ma le aofai o lau foai.
• E sili atu i le $5000 lau tupe maua o le tausaga, o oe foi o se tagata totogi lafoga.
Fesili – Ou te fia tulituli atu pea le fesili o i luga. E leai se faaletonu o lo‘u faamalieina o itu e tolu pito i lalo. Ae o le itu muamua e pei ona e ta‘ua, e foliga mai e ono lavelavea ai a‘u i le tulafono?
Tali – E moni lau saunoaga manaia foi le fesili ona o tulaga faapenei, a taumafai e faafetaui le tatou aganuu ma le tulafono, ua lē paepae lē uliuli le tatou mataupu ae faaefuefu.
Ae o le a faasoa atu lou talitonuga. O le mafuaaga moni na ala ai ona foai le $5000 o le faamalieina o le tatou aganuu. A sau se sii alofa, e tatau lava ona teu. Ana lē sau le sii, e lē foaiina le $5000. Lona uiga e lei foai fuaina e aunoa ma se taui. Ae a foai lenei $5000 i le taimi o le lotu o le toe sauniga, ma le faaupuga o le meaalofa a lē ua maliu mo lana ekalesia. Ua lava se palapala malo e teu ai le sii alofa a o le tino i tupe taumafai e fai ai le foai lea i totonu o le falesa. Tapa i le Teutupe e fai mai se lisiti. Ou te talitonu e leai ma se tutaia o le maua o lau refund.
Fesili – O le tausaga lea ua tea na fiu e faatali la‘u refund o lisiti a le lotu. Telefoni atu ae fai mai le tali a le Ofisa o lafoga e lē mafai ona aumai la‘u refund se‘i vaganā ua faila la‘u lafoga?
Tali – A faapea na faila lau lafoga i le tausaga ua mavae e manaomia le faila muamua o lau lafoga ona faato‘ā mamulu mai lea o lau refund. O le mafuaaga o lenei tulaga, ona o le tulafono e lē mafai ona sili atu le aofai o lau lisiti i lo lou totogi poo le tupe maua o le tausaga. E faato‘ā maua uma e le
Ofisa o lafoga nei faamaumauga pe a faila atu lau lafoga. Afai na faila lau lafoga i le tausaga ua mavae, ae ua e talitonu o lenei tausaga e lē manaomia ona toe faila se lafoga, ona logo lea o le Ofisa e tusa ai ma lenei suiga pe valaau mai foi le tatou ofisa.
Fesili – Se‘i aumai se faataitaiga o le tulafono lea e faapea e lē mafai ona sili atu le aofai o la‘u lisiti ilo lo‘u totogi poo le tupe maua o le tausaga?
Tali – E iai se tina e nofo i le fale e vaai lana fanauiti, e leai sona totogi na maua mo le tausaga atoa. E fai lana matafale i le lotu e fai foi ana foai tusa ma le $2500 le aofai o lana lisiti. E lei taliaina e le Ofisa o lafoga lenei lisiti ona e leai se totogi na maua e le tina. Ae na mafai ona faaaogā e le toalua o le tina le lisiti maua ai lana refund, ona sa faigaluega o ia ma maua lona totogi $38,000 mo le tausaga atoa.
Fesili – O lo‘u afafine o lona tausaga mulimuli lenei i le kolisi o Otahuhu, lea ua maua lana galuega part-time ia McDonalds. E tatau ona totogi sana lafoga ona e lē tele ni ona aso faigaluega?
Tali – A sili atu i le tolu ona itula faigaluega i le vaiaso, e tatau ona totogi lana lafoga. O le isi tulaga e manatua e ono faaopoopo mai ona itula faigaluega i le taimi e tuua ai aoga. O la‘u fautuaga e sili le toese o le lafoga i le taimi e fai ai le totogi, i lo le tigaina e toe totogi se aofaiga ua tele atu atoa ma ni sala pe a uma le faaiuga o le tausaga. Ae a ova le lafoga e totogi, e toe faafoi mai lana tupe e le Ofisa.
Fesili – O le matou pisinisi e tufa le pepa i pusameli. Matou te faafaigaluegaina tamaiti aoga tulagalua o loo fia sue se latou seleni. E na o le tai $40 a le tamaititi e maua i le vaiaso. Ou te lē o manino lava pe faafefea le itu tau lafoga?
Tali – A e faafaigaluegaina se tamaititi aoga ae i lalo o le $45 lona totogi i le vaiaso, e leai se lafoga e totogiina. E mafai lava la ona ave sa‘o i le tamaititi lana $40 e aunoa ma se lafoga e toesea. Ae a sili atu i le $45 le tupe e maua, e leai lava se eseesega o tamaiti ma le isi au faigaluega matutua. Ave i ai le pepa IR330 e faatumu, ma toese le lafoga mai lona totogi.
