O le faaiuga o le vaiaso na vaaia ai foi le mataina o taaalo a tama Samoa i soo se vaega o le kelope i tausinioga o lakapi liki, Iuni, faapea le Supa 15.
I le taaloga a Egelani ma Farani i le taamilosaga a atunuu e Ono a Europa na manumalo mataina Egelani e 23-13 a Farani e ui o Wesley Fofana na muamua sikoa mo Farani.
Na amata lenei taaloga ae manu‘a Tuilagi i lona taliga na masae i le taimi na fetoai ai ma le loka a Farani ia Picomole lea na atoa le 19 o filo e sui ai lona taliga ina ua uma le taaloga.
Na o le pau lea o le sikoa a Egelani i se taaloga mataina ua lua ai ana Malo e tolu ia Sikotilani, Aialani ma Farani. O le taimi muamua lea ua toe taaalo ai Manu talu mai lona manuaga.
Na fiu le fomai a le ‘au e vavao Tuilagi ina ua manu‘a i le amataga ae na lē mafai le alo o Samoa i le fia taalo. Na matuā ofo le au atoa i le uma o le taaloga o alu lava Manu. Na ripotia e uma le taaloga ae tusa ma le 30 minute o su‘i le taliga o le tamaloa.
Ua toe nei o taaloga ma Italia ma Wales. Afai e suipi ai lona uiga faatoa toe ausia lea e Egelani o le siamupini o le Grand Slam talu mai le 2003.
O le faaiuga o le vaiaso na tea nei e lei atoa se sefulu minute na faatau ai pepa mo le taamilosaga a le Liona ae uma (sold out). O lenei malaga mai a le Liona e fetaui ma le Wallaby faatoa maimoa ai Sini nei i le maoae o Manu Tuilagi.
I le taaloga o le liki na fetaui le Storms mai Melepone ma le Leeds o Egelani i le sailiga siamupini a kalapu o le lalolagi na faia i Lonetona. E ta le ‘afa o tutusa 8-8. O sikoa e lua a le Storms na maua i totonu o le 4 minute mai le alii Maori o Jesse Bromwich faapea Tohu Harris, na maua ai le 18-14 mo le manumalo mataina a le Storm.
O le sui o le Toa Samoa ia Kylie Leuluai na vaaia foi le mataina o lana taalo mo Leeds. O se sui iloga o le Toa Samoa i le taamilosaga o le lalolagi i le 2008 ma o se tasi o loo faamoemoe i ai Samoa mo le Ipu o le lalolagi i le tausaga nei.
I le Supa 15 e lua sikoa mataina a le Alii o Ben Tapuai na maua i le taaloga ma le Waratahs lea na manumalo ai Kuiniselani 25-17. O le taaloga muamua lea a Israel Folau mo Niu Sa Uelese auā sa pai i le vaiaso talu ai.
E ui na sikoa muamua Folau ae na malosi le osofai a le Reds lea na faiaina i le Brumbies i le vaiaso talu ai.
I le taufaaiuiu o le taaloga na aapa i luga Israel Folau e sapo se pasi maualuga ae maua lelei ai le avanoa o Digby Ioane e sunu‘i ai le puimanava o le alii iloga mai le Broncos. Na manumalo le Reds 25-17 ma ua sauni atu foi Folau ma Ioane i le togalauapi a le Wallaby e tapena ai mo le malaga mai
a le Liona.
