Na teena e Josh Papalii lona avanoa e taalo ai mo Niu Sila, ona o lona naunau e fia taaalo mo Queensland i le taamilosaga o le State of Origin i le lakapi liki.
O Josh Papalii o loo taalo nei i le kalapu lakapi liki a le Canberra Raiders, na ia faailoa i le nusipepa a le Sunday Canberra o loo fai lana filifiliga, pe taalo mo Samoa i le taamilosaga o le Ipu a le Lalolagi i le masina o Novema i le tausaga nei i Egelani.
O tuaa o Josh o Patrick ma Lauama na malaga mai i Samoa ma faamautu i Aukilani ma fanau ai Josh i Aukilani.
I lalo o taiala a le Ruby League International Federation, e agavaa ona taalo Josh mo Samoa i le Ipu o le Lalolagi ia Novema, e mafai foi ona toe foi mai ma taaalo mo Queensland ma Ausetalia pe a mae‘a le Ipu o le Lalolagi, ae lua la tausaga e lē mafai ai ona toe taalo mo Samoa; o lona uiga e oo atu i le Ipu o le Lalolagi i le 2017, ua mafai foi ona toe taalo Josh mo Samoa.
O le vaiaso na tea nei na faatalanoa ai e Josh McGuire o se alo foi o Samoa o loo taalo nei mo le Broncos, ia Papalii pe fia taalo mo Samoa. Na ta‘ua e Papalii lona fiafia e taalo mo Queensland ma Samoa pe afai e aloaia mai le valaauina o ia e le Toa Samoa.
I le taimi nei e leai se tala aloaia mai le Iuni Lakapi Liki a Samoa mo Papalii, i lona taalo ai lea mo Samoa peitai, ua nofo sauni Papalii e talia le valaau pe a oo mai.
Na ia faamanino foi e le faapea o le a taalo mo Samoa, ona ia faatuatuanai ai lea o Queensland, o lona loto atoa lava e fia taalo pea mo Queensland i le lumanai.
