“IA SOO LE FAU MA LE FAU”, o le autū lea o le faatasiga a suli ma feoi o i latou na tutupu mai ia Lemalufaitoaga Pio i Nofoalii.
O le autū sa taulai lea i le faalototeleina o alo ma fanau a le aiga, e mafai ona ofo atu lo latou soifua ma le ola e tautua ai i le galuega a le Atua, e ala i le tala‘i atu o lona finagalo.
E silia i le 140 alo ma fanau a lenei aiga na malaga mai i Ausetalia, Hawaii, Samoa ma tulimanu e fia o Niu Sila e auai i le faamoemoe e pei ona faataunuuina i le El Rancho camps and events i Waikanae Ueligitone.
Sa auai nisi o Lupefaalele a lenei aiga o loo galulue i le galuega a le Atua, e pei o le Afioga ia Patele Kolio Kelekolio mai Samoa, faapea le Susuga i le Faafegaiga ia Paselio Lemalu Lemi FK, mai Melepone Ausetalia.
Sa faatasi uma ai foi matai o loo tausia le aiga i le taimi nei e pei o le Afioga i le Sa‘o ia Lemalufaitoaga Felise Soopele mai Brisbane, o le tofa ia Tanutanuposemanaia Mikaele Malaga mai Samoa, faapea le tofa ia Tanutanuposemanaia Fiu Fogalevai Aukuso mai Aukilani.
I aso e tolu o lenei faatasiga sa faasoa ai le aiga i taleni o taaloga, o faafiafiaga faapea talanoaga faalauaitele, aemaise o le faamalamalamaina o le gafa ma talaaga o le aiga, ina ia iloa ma malamalama alo ma fanau lalovaoa a le aiga i le gafa ma lo latou tupuaga.
O se faatasiga foi sa lololo i taumafa faaleagaga sa molimoli mai e Lupefaalele a le aiga, ina ia mafai ona mālie i luma o le Atua le taulaga fai a le aiga, e ala i ana tamafanau o loo ofoina atu lo latou soifua e tautua ai mo lona finagalo.
I le tala faasolopito o lenei aiga, e tatau lava ona iai nisi mai augatupulaga taitasi e galulue i le galuega a le Atua, o se taulaga sa faaauau mai pea e tuaa ua taooto mai nei tiasa. O le taimi nei e toafā alo ma fanau a lenei aiga o loo i le galuega a le Atua, o le Afioga ia Patele Kolio o loo galue i Samoa, afioga ia Sister Palepa Numi o loo galue foi i Samoa, o le afioga ia Sister Palepa Lemalu Aukuso o loo galue nei i Columbia ma le Susuga ia Paselio Lemalu Lemi ma le faleuta ia Imeleta o loo galulue i Melbourne Ausetalia, faapea le alii A‘oa‘o ia Manupo Lemalu Aukuso ma lona faletua ia Lautasi o loo a‘otauina nei i le kolisi Faatelosia i Moamoa.
O le tapenaga atoa o lenei faamoemoe sa feagai lea ma alo ma fanau a le aiga o loo aumau i le laumua i Ueligitone sa ta‘ita‘i komiti ai le tausi ia Kasileta Agafili, failautusi le tamaitai ia Seata Anastacia Pritchard ma le teutupe faamaoni o le afioga ia Tuifaasisina Pana.
E maeu le tapena sa molimauina e lē gata i taumafa ae o le matagofie o nofoaga sa api ai le aiga potopoto. E lei faigofie ona tatala lenei mafutaga mafanafana i aso e tolu, auā e faigofie ona feiloai ae faigata ona faatofa.
E ui i lea e iai lava le mutaaga o mea uma, ma le faamoemoe ua tasi i ai le aiga potopoto, o le isi faatasiga poo le reunion o le a faia lea i Samoa i le tausaga 2016.
