Auē ua maliliu toa ua maumau ai auupega o le taua! O le Aso Gafua 14 o Ianuari na tuumalo ai le susuga ia Sione Otulau Olakepa Saluni, o lē sa tu i matagi olo i le tautuaina o le Ekalesia Aso Fitu i Lower Hutt faapea foi ma Porirua i totonu o le itumalo i Ueligitone.
E tele le sao tāua a lenei tamaalii i le tautuaina o le galuega a le Atua i ona tofi taitai ma ona tiute sa tofia ai e auauna i le taumafaiga o le faatuina o le malumalu e tapuai ai le fanau a le Atua i Porirua, e pei ona molimauina e le aiga, le fanau ma sui o le Ekalesia, o ē sa galulue faatasi ma lenei tamā i taimi o lona malosi.
O le susuga ia Sione o le alo o Isileli Saluni o le nuu o Leimatua, Vava‘u i Tonga ae o lona tina o Faasua Hingano Semo o Fasitoouta ma Tanugamanono.
Na taunuu mai i Niu Sila i le 1965 i le 32 ona tausaga ma faaipoipo ai i lona faletua o Feagaimaalii Leuga Vaipou mai Tiavea i Saleaumua, i le tausaga e 1967.
O lenei tamā sa auauna i le tautuaina o le atunuu i le laumua i lana pisinisi o taxi i tausaga e 23 seia oo ina aulia lona 65 tausaga ma malolo ai loa.
Ae lei uma ai iina lona tautua i le lotu, ma o lana galuega tele lea o le talanoa pea i ona alo ina ia toaaga i le lotu ma ia tumau i le Atua.
O se tama kerisiano ona uiga uma e pei ona molimau ona aiga ma lana fanau faapea foi i susuga i Faifeau na latou amataina le galuega o le malumalu a le Ekalesia i le laumua.
E toaono o la alo ma ua maua faailoga o le atamai mai Iunivesete eseese sa aooga ai ma ua fai aiga ma faamanuiaina ai i ni fanau (grandchildren) sa fai ma mea fiafia ma tāua tele ia Sione.
O loo ua faigaluega nei i ni galuega lelei le nofoaalo ma ua faapea foi ona faaauau le taleni a lo latou tamā o le tautua atu i isi tagata e ala ia latou galuega ua tofia ai faalemalo.
O le po o le Aso Gafua na faia ai lona lotu faaleaiga i le malumalu o le Ekalesia Aso Fitu i Porirua ma o le susuga ia Apineru Vaimoso Apineru na saunoaina le upu faamafanafana saunia lelei ma le logo i tino mo le tina faanoanoa faapea le nofoaalo ma le aiga faanoanoa.
O le Aso Lua na faia ai sauniga faamavae ma auina atu ai lona tino e falelauasi i le tuugamau i Whenua Tapu.
Na valaauina le susuga i le Taitai o le sauniga ma le aufaigaluega a le Atua atoa ma le aofia na auai, i le taumafataga faamavae ma momoli ai foi faaaloaloga masani e pei lava ona masani ai le atunuu.
-Momoli tele atu le faalototele i le tina faanoanoa ia Feagaimaalii Leuga Vaipou ma le nofoaalo faapea aiga na lua.
