Feiloai sui o le Aiga Samoa i Logan City ma le palemia o Samoa

Na leai se vaega na toe gasē pe pa‘ō a o tolaulau e le Peresetene o le Aiga Samoa Logan City faapea le aumalaga na malaga i Samoa mo le latou feiloaiga ma le afioga i le alii Palemia o Samoa, Tuilaepa Sailele Malielegaoi.
Na tutulu nisi o tuaa sinasina o le mafutaga a le Aiga Samoa Logan City ma faafetaia le afioga i le alii Palemia e tusa o lona amanaiaina o le tagi atu a tagata Samoa i Brisbane mo sana fesoasoani e tusa o lea mataupu.
O sui o le Aiga Samoa Logan City na malaga i Samoa, Peresetene Mataafa Hakula Siakisini ma le faletua ia Anne Siakisini, afioga ia Leota Tavai ma le faletua ia Toa, Sisi Polelei, Utai Lokeni Utai ma le faletua ia Lolua Utai, ma le faletua ia Talaoloa Ah Kan.
Na toe taliu mai le faigamalaga i le Aso Toonai 21 Setema 2013 a o le Aso Sa na sosoo ai sa faia ai se toonai tuufatasi auā le aumalaga ma faafofoga ai le mafutaga i lea lipoti e pei ona ta‘ua i luga.
Na matuā faamalieina uma tamā ma tinā matutua i le logomālie o le lipoti e pei ona taatia ai nei le finagalo o le Palemia o le a tusi i Taitai faale-Stake, Taitai o le Eria faapea Taitai maualuluga o le Ekalesia Mamona i se fesoasoani i le tulaga lea sa aveeseina uma ai Uarota Samoa, Tonga ma isi atunuu (ethnic unit) i Brisbane Ausetalia i le aso 16 Setema 2007.
O le autu moni o le mau a le Aiga Samoa Logan City o le toe faafoiina mai lea o Uarota Samoa ia malamalama uma ai tagata i aoaoga o le Talalelei aemaise lava nai tuaa sinasina e tele ina lē malamalama i le gagana peretania.
O le taimi na tapunia ai Uarota Samoa i Brisbane sa lei faailoaina e taitai i le taimi na siilima ai tagata o Siteki taitasi e tusa o fesuiaiga o Eria poo Taitai faale-Siteki i le taimi o le Konefesi, i le mae‘a ai o siiliga lima (sustaining vote) faatoa mafai ona faailoa i tagata nei fesuiaiga i le toe 10 minute mae‘a le sauniga i le taimi o le lauga mulimuli po o le final remarks a le Taitai lea faatoa ta‘u atu ai i tagata, ua tapunia uma iunite e faaaogāina gagana e iai le gagana Samoa, ae o le a na o le gagana faaperetania e faaaogāina.
I le aso 7 o Oketopa 2007 na sau ai le isi faasilasilaga mai le Epikopo palagi Bishop Willoughby, ua faatonuina latou e taitai faalesiteki, e matuā faasāina ona toe tatalo, lauga, pese pe molimau se tagata i se gagana ese se‘i vaganā lava le igilisi tusa lava pe na o le 2 i le 3 upu e tautala ai ae ia faaaogā lava na o le igilisi.
O le epikopo foi lea na ia ioeina lava i luma o le faamasinoga, e moni ma faamaoni sa aumai le faatonuga mai Taitai o le Siteiki i lana Uarota e matuā tapu lava ona toe tautala se tagata i lana gagana ua na o le igilisi lava e faaaogāina.
O loo iai uma faamaumauga o molimau e pei ona tauaaoina e le tamaitai loia ia Leuluaialii Olinda Woodroffe aemaise sui o le Aiga Samoa i Logan City.