E toavalu sui o se aiga e tasi sa taualuga ma faapaia le samaina o a latou tatau i se sauniga na faia i le Aso Toonai na tea nei i Otara. O le upu e masani ai Samoa, “o faiva e tapuaia, o faiva na e a‘e manuia.”
O lagona o le fiafia ma le mitamita i aiga uma, o uo ma aumea mamae ma i latou uma sa tapuaia le alo atu o le toavalu o sui o se aiga e tasi, mo le samaina o a latou tatau i le Aso Toonai na se‘i mavae atu nei, ina ua iu manuia galuega o le lagimalofie sa feagai ai mo le tele o vaiaso. E lē se galuega faigofie, o se faamoemoe sa tapuaia ma talosia pe tua ma ni ā, ae o le faafetai ma le viiga e sii a‘e i le matai i le lagi ina ua mae‘a i le manuia ma le fiafia. Saunoa Fualau Aukuso o se tasi o tamā ua laei nei i le measina a Samoa, e lei augata lona ia tagata e faatino le galuega i lona tino, ona o se moemitiga ua leva ona moemiti i ai.
Ma sa pei ai o se meanoa ia Aukuso tiga o le tino, ae na taulai lana vaai i le iuga o le galuega, lea ua avea nei o se mitamitaga ia te ia, aemaise foi si ona faletua ia Eleta ma le nofoaalo, tainane le tapuaiga lē leoa a si o latou tina matua, lea sa tatalo ina ia iu manuia le tāga o le tatau a le tamā ia Fualau.
Sa faauli foliga o le tau i le Aso Toonai a o alo atu aiga mo le tapenaga o le faamoemoe, peitai ina ua laei uma le toafitu o alii ma le tamaitai e toatasi, le faletua ia Māina Mulipola Peni, i o latou laei silika sausauuro, ua atili ai ona segaia le iila o sogaimiti a nei tamalii ma alo o Samoa ma le malu a le faletua.
E soo se Samoa lava na te laeiina lenei measina a le atunuu, e oo ifo lagona o le mitamita ona o se faailoga mautu lea, ua sauni e faaauau atili le tautuaina o aiga, nuu faapea le galuega a le Atua.
O le mae‘a o upu faaleagaga a le afioga Patele, faapea le faamanuiaga a le Matuaofaiva, le afioga Tulouena i le ‘au taooto, o le faailoga foi lea ua tatala uma sā o le galuega, ona saasaa fiafia lea o sogaimiti fou, le aiga ma le auvalaaulia e taualuga ai le samagā tatau.
O i latou sa taliau mo le tele o vaiaso o le Afioga Mulipola Peni mai le afioaaga o Manono ma le faletua ia Māina faatasi ma nisi o la alo tama, faapea le susuga Fualau Aukuso mai le afioaga o Lotofaga, Lalomanu ma Vailoa Faleata.
O le matuaofaiva sa nafa ma le galuega fita o le Afioga Tulouena Laulu Andre Fakalago (Manono, Safotu, Fusi Safotulafai, Falelatai, Fasitoouta, Apolima). O se matuaofaiva o loo talavou pea i lona soifua, ae maeu foi lona tomai i lenei taleni ua faatomaiina ai o ia.
O se taumafataga tele na saunia e tauaiga e tali ai le sua a le mamalu o le auvalaaulia, aiga, uo ma ē masani, a o lei alo i faaaloaloga masani e faamatafi ai le faamoemoe i lea aso.
