O le taunuu mai o le faigamalaga a le vaega o loo galulue nei i le faatinoga mai o le ata tifaga o loo sili foi ona fiafia i ai le maimoa a le atunuu i lenei vaitau, le Silamanino, o le a maua ai se avanoa e le toatele o le mamalu o le atunuu e lulu aao ma talatalanoa ai ma le toatele o i latou o loo faatinoina vaaaiga eseese o lenei ata tifaga.
O le malaga taamilo a le afioga i le tamaitai pule o le ata tifaga, le faletua ia Eliza Tiavaasu‘e Hunt ma le augalulue atoa o le ata tifaga, o le a latou asiasia ai le atunuu i luga i Aukilai faapea le laumua i Ueligitone. O se avanoa o le a latou taumafai ai foi e feiloai totino mai i le mamalu o le atunuu o loo alala ma papaaao i Niu Sila nei, aemaise i latou o loo fiafia ma lagolagoina le maimoaina o lenei ata tifaga matagofie.
O loo faailoa atu le faasologa o le latou malaga taamilo aemaise o aso ma nofoaga o le a fai ai a latou feiloaiga ma le mamalu o le atunuu, faapea nisi o latou faafiafiaga faakoneseti ua fuafua o le a faataunuu i nofoaga ua faatulaga i Aukilani ma Ueligitone.
O se avanoa lelei lenei mo le tele o fesili e fesiligia ai alii ma tamaitai o le ata tifaga, i ni o latou lagona i nisi o vaega o loo latou faatinoina i totonu o lenei ata. O loo omai sauni foi le au malaga e faatalofa mai ma pue faatasi o latou ata ma soo se tasi lava e manao ai, ae ia faia uma nei feiloaiga i totonu o taimi ua faatulaga atu i le latou faasologa, ona e fai si pisi o le latou faasologa a o iai i Aotearoa nei.
