E vivii fai a‘e le agaga ina ua iu manuia le faamanatuina o aso fanau o le tautua a le fale laei ma le tautua fesoasoani a le afioga i le faletua ia Tofiga Tuigamala.
Na leai se ofi o le malu o fiafiaga i le pitonuu o Hamton Park i le afiafi o le Aso Toonai na tea nei, i le paia lasilasi o Samoa potopoto mai lava i auauna faauuuina a le Atua, tuaa sinasina seia oo lava i le tupulaga, i le faailoa o le agaga lagolago ma patipatia le valaau faaaloalo atu a le tautua a le B&T ma lo latou ofisa mamalu.
O le fa‘ili malosi a le Pioneer na nafa ma le faafiafiaina o le saasaa faa-Samoa ma le siva faaonaponei aemaise o pese faalogologo, o le fetalaiga ia Namulauulu Tutuila na fai ma fofoga o le afiafi, ma na mataina le galulue faatasi ma le fofoga malie o le susuga ia Cindy of Samoa.
Na mua mea i Matautusa i le tatalo ona amata loa lea o le tautua a le fa‘ili, ma tali ai le sua i le taumafataga tele ma le matagofie a o faasolo faafiafiaga a nisi o tamalii iloga o le atunuu. Na amata i le siufofoga mālie o Aumua Toafa Te‘o, sosoo ma le siufofoga faatagitagi manaia o Cindy of Samoa, faapea le taleni ta‘uta‘ua a le afioga ia Asuao Felise Mikaele
Na tele molimanao na fai ai ma tova e Cindy le tele o taimi, o se uluai taimi foi lea ua faafofoga ai Samoa ae pepese faatasi Cindy ma Felise. Tele saasaaga faa-Samoa ma siva faapapalagi na fai ma maua ai meaalofa CD pese a le mamalu na mataina la latou siva i lea po.
O se tasi o tulaga mataina o le taimi na fai ai le tauvaga laei, na faasolo i vaega o alii, vaega o tamaitai, ma faaaliga tai toalua, na uigaese foi lea suiga ona o le toatele na lagolagoina lea foi tulaga, ae o le pine faamau o le Aso soifua o le B&T, o le se‘iina o le lulu mo le pasese e malaga ai le tagata i Samoa ma toe foi mai, o le mealofa na tauaaoina e le World Travel.
Na tele ma anoanoai nisi foi o meaalofa na foaiina e Tofiga i lea po mo le mamalu na afifio atu, e le taumate na matuā faafiafiaina uma finagalo o le atunuu mamalu na lagolagoina le faamoemoe, o uo ma paaga a tofiga, o ona tauaiga, o le mamalu o faipisinisi, o sui mamalu o faalapotopotoga, o le paia i le aufaigaluega ma ekalesia eseese, o le au faafiafia na malaga mamao mai Niu Sila ma Brisbane aemaise le mamalu lautele.
Faafetai Faafetai tele mo lo outou afifio mai ma le lagolago mai, ua maualuga ai lo matou faamoemoe, toe faatumu e le Atua mea na outou foai, e le galo lo outou agalelei. Faafetai Samoa faaeaea. O sa matou tautua faatauvaa ia avea o se taulaga e tautua ai oe.
