O le taeao o le Aso Toonai na mavae atu a o faafofoga le mamalu o Samoa i Sini i se tasi o polokalame e faafoeina e nisi o alo tamaitai o le atunuu na palauvale ai se tasi o tina faasalalau i luga o le ea a o faagasolo la latou polokalame. Na saunoa lea tamaitai i se upu masoā e aunoa ma lona iloa e lē o le upu lea e tatau ona faaaogāina e faamatala ai se tama poo se alii e ta lana tatau poo se ‘sogaimiti’.
O le upu Samoa masoā sa ia faaogaina e amata i le ‘f……’ ma e tai faaleo tutusa ma le ‘sogaimiti.’ Na ata faamaela le tamaitai soatau o lenei tina i luga o le ea i le taimi na saunoa ai lana uo i lenei upusa ma faatoa ia faailoa atu e lē migao le upu sa ia saunoa ai. Sa taliē i laua i luga o le ea ma taumafai e sui le mataupu na talanoa i ai.
Na fesiligia nisi sa faafofoga i lenei polokalame ma o latou faailoa ai le faatamala o nei ituaiga talanoaga ua iloga ai le sese i sini o upu faaaogā. Sa faaalia e se tasi o tina mai le Campbelltown sa fesiligia le mafuaaga o nei sasi faapenei. “Ua toatele lava le fanau talavou ua soifua mai i Sini ua leai se taimi e fesilisili ma saili le uiga tonu o upu mai mātua, aiga ma tuaa sinasina.”
O lenei polokalame Samoa i taeao o Aso Toonai e faatautaia i le gagana Peretania vaganā ai nisi vaega e faaaogā ai le gagana Samoa. E lei faia se faamaluluga a nei tamaitai i le taimi na lafo ai lenei upu masoā vaganā ai le taliē ma le lē mautonu.
Na saunoa se sui o le Sydney Samoa Media Association lea e faamanatu i le aso 15 o Novema lo latou tausaga muamua talu na faamaopoopo, “O le faanoanoaga e lē fia auai sui faasalalau laiti nei i le Asosi lea e ono maua ai se fesoasoani i le gagana ma le faaleoina o upu Samoa.”
O isi itu o tapena e lenei Asosi e aofia ai aoaoga (workshops) i le tuufaatasia o talafou ma polokalame pupuu ma talafeagai i luga o leitio Samoa. O le faatonutonuina o le tusiaina o pepa o faamatalaga ma va feagai ai ma le autusitala ma faasalalauga.
