“La‘u pele e, faauta ua lalelei; faauta ua lalelei oe; ua ni mata o se lupe ou mata ai totonu o lou ie ufimata”.
O le Aso Toonai, aso 7 o le masina lenei o Setema, na ofaga potopoto ai le paia o aiga na lua, le mamalu o le valaaulia aemaise o a la uo ma aumea mamae, e sii faatasi le viiga ma le faaneetaga i le Atua o mafutaga, ma patipatia lo la faamoemoe ua leva ona moe miti i ai, o le tuufaatasia lea o lo la aiga fou e ala i le faaipoipoga.
O le aso tele o Joel Ioelu Tuiloma ma Leisa Gerrard na faataunuuina i le malae o faagatama Mcleod Country Golf Club i le pitonuu o Mount Ommaney, i le aai o Perisipeni i Kuiniselani.
O tupuaga o le alii faaipoipo, o se alo e faasino ia Tuipine Tito Tuiloma ua lagomau mai ti‘asa, o afioaga o Magiagi ma Vailoa tai i Tutuila, ma le faletua ia Fuamai Nonu o Siumu.
O le tamaitai faaipoipo o si ona tamā o Tony mai le atunuu o Sikotilani, ma si ona tina ia Inez mai le atunuu o Tenemaka. Na fofogaina e le faletua ia Fuamai le molimau mo si ona alo, a o le molimau mo le faatoanofotane na fofogaina e si ona tamā.
Na uigaese le matagofie o le sauniga i le susulu manaia o le la, lafoia ai ataata ma le feilafi o lau o laau ma le sasala o fugalaau manogi, a o le paolo o nisi o laau mafalā na afifio ai le mamalu na potopoto ma silaloa i le faatauata o le la ma laei o le ulugalii fou, ua moni ai Solomona “faauta ua lalelei oe la‘u manamea”.
Na mae‘a le sauniga sosoo ai ma le taumafataga felanulanuai ma ta‘ape ai ma le viiga o le Atua ua maualuga. O nisi o tauaiga sa molimauina le aso na malaga mai Niu Sila, Samoa, faapea ma Sikotilani.
O Faamanuiaga mo lo lua Aiga Fou, ma alofaaga mai o lua matua peleina, o lua aiga uma, aemaise o a lua uo ma aumea mamae uma. Tumau i le fealofani, ma faamuamua le Atua. Manuia lo lua aiga fou, Joel & Leisa!
