O loo taooto nei i le falemaliu o le maota gasegase o Tupua Tamasese Meaole i Motootua tino maliliu o ni alii se toalua e faatali ai le aso e faia ai o la toe sauniga, ona seiloga e mae‘a suesuega a leoleo o loo faagasolo.
O le tasi o i laua o se tane ua 41 tausaga le matua ua faaipoipo e toatolu lana fanau, a o le isi e 27 tausaga o le soifua, ua faaipoipo e toatasi lona alo. O i laua uma e mai se aiga e tasi i le afioaga o Ulutogia Aleipata, lea foi e talitonu leoleo o le nuu lea o se alii 40 ma ona tupu tausaga o loo tuua‘ia ma ua molia i le fasioti tagata faamoemoeina.
O le vaveao o le Aso Lua, 11 o Mati 2014 na tupu ai le faalavelave lea ua faailoa e leoleo na osofai ai i laua ua maliliu e lē ua molia i se agaese (sapelu). Poo le lua i le vaveao na faatino ai le solitulafono, lea e faapea ni molimau, na muamua osofai le tamā 41 tausaga a o moe pe tofa ma si ona toalua ma lana fanau i le tainamu.
E lē mamao tele le fale o lē na muamua faia i ai le gaioiga ma le fale o le tamā 27 tausaga na mulimuli faia i ai le gaioiga i le agaese. E faatino foi e pei ona faaalia e leoleo, o loo momoe ma lona toalua ma si a la tama.
O se faamatalaga mai se tasi o le aiga ua lē manao e faailoa lona suafa na ia ta‘ua ai, na valaau ane le tamā o lē na muamua maliu mo se fesoasoani ina ua iloa e iai le faalavelave matuia ua tupu.
E faapea na faalogo ane le toeaina ua ese le taagulu a lona atalii ma alu ane ai e vaai, ma lona leiloaina ua maliu, ma o le taimi lea na ia valaau ai mo se fesoasoani. Peitai o le taimi lea ua faalogoina ai le faufau ee ane o se leo o se tamaitai, o le toalua lea o le alii 27 tausaga le matua na mulimuli faia iai le gaioiga, aua o le taimi lea ua oo atu ai le ua molia ile fale o loo momoe ai le ulugalii.
O le faamatalaga a le sooupu o le matagaluega o leoleo, o se taugaupu i uta i le fanua o le aiga i le va o i laua ua maliliu ma lē ua molia o loo masalomia o le mafuaaga lea o le faalavelave.
E faapea mai foi nisi molimau na mafua le taugaupu ona o se mataupu i fanua. E lei aveina i le falemai i Lalomanu tino maliliu o i laua na aafia ae na aumai sa‘o i le falemai i Motootua. O le taeao o le Aso Lua na tupu ai le faalavelave ina ua malamalama na faatoa agai ai leoleo i Ulutogia mo suesuega, lea na latou aumaia ai ma le alii ua nofo taofia ma molia i le faalavelave.
O le alii 27 tausaga ua maliu ai o se maupaolo i le aiga, lea e faapea o le tuafafine o le tamā 41 tausaga ua maliu ai foi la te nonofo. Ia faamaise pea le Atua o faamanafanaga i aiga ma fanau ona ua motusia le mafutaga ona o faalavelave e lei mafaufauina e se isi, ae ua maumau ai le soifua talavou.
