E 23 tausaga o se alii Samoa, o James Fruean ua faasalaina nei i le fitu tausaga ma masina e lua i le falepuipui, i moliaga o lona osofaia o se teineitiiti aoga i Masterton i se tasi o afiafi ma fai i ai ni faigaaiga faamalosi.
O le aso 3 o le masina lenei o Me na lauina ai lenei faaiuga i le Faamasinoga Itumalo i Masterton, ma faailoa atu ai foi e le faamasino, Judge Peter Hobbs i le alii lenei o James Fruean, o le a faatoa mafai ona toe iloiloina sona agavaa i le palola pe a uma ona tuli le tolu tausaga ma masina e fitu o lona faasalaga.
E fā moliaga o Fruean na tulai ai le faamasinoga ma sa ia ioeina uma na moliaga. E aofia ai lona faia o ni faigaaiga faamalosi i se teineitiiti 14 tausaga i Masterton, le faiga o isi uiga matagā faasolitulafono (unlawful sexual connection) i le teineitiiti ma lona aveina faamalosi mo le faia i ai o ni faigaaiga.
O le moliaga lona fā e faasino atu i se isi solitulafono a Fruean na ia faaoolima matagā ai i se isi foi tamaitai i Ueligitone, lea na tatala ai i tua i ni tuutuuga faaletulafono a o faatali lona faamasinoga i lena moliaga, ae ona toe solia ai foi le tulafono i mea matagā ia sa ia fai i le teineitiiti i Masterton.
A o lei lauina atu le faasaga o Fruean, na tuu atu e le faamasino, Judge Hobbs se avanoa i le teineitiiti 14 tausaga mai Masterton lea ua afaina mai nei faigaaiga faamalosi, ina ia lau mai i luma o le faamasinoga, lana faamatalaga e tusa ai ma āuga ua oo i lona olaga talu ai lenei solitulafono na faia ia te ia.
Ta‘ua e le teineitiiti, na alu ese ai mai Masterton ina ua uma le mea na tupu ia te ia i le masina o Setema talu ai. Na ia te ia lagona o le masiasi ma le faalumaina, ma sa oo ane lagona ua mā e alu ese atu i fafo mai le fale.
Fai mai lana faamatalaga, o le taimi nei ua musu e toe moe na o ia i lona potu talu ai le fefe ina ne‘i alu atu se tagata leaga i le po ma faaleaga o ia.
E matuā ogaoga aafiaga ua oo i lenei teineitiiti talu mai ona uma le faatinoga o lenei faigaaiga faamalosi ia te ia, ma ua ia lē toe talitonuina lava se tasi.
E matuā lē masani lava le teineitiiti i le alii lenei o Fruean, i le taimi na osofaia ai o ia e Fruean a o savali atu i le fale o lana uotama, i le tusa lena o le 9:30 i le afiafi o le aso 29 o Setema.
E ui lava i nei mea uma na tutupu, ae fai mai le teineitiiti, ua ia “lē manao e toe mafaufau i ai” ma e lē o inoino foi ia Fruean i le mea na ia faia. Fai mai le teineitiiti ua ia faamagalo atu i lē na osofaia o ia.
I le aso na lauina ai le faasalaga o le alii o Fruean, sa iai faatasi ma se tagata sa faaliliuina faasamoa taualumaga uma o le faamasinoga, ma sa na o le saofai o le alii o Fruean i totonu o le tamaipotu mo pagota i totonu o le potu faamasino, ma punou ai le taimi atoa o le faamasinoga.
Ina ua tāaofai e le faamasino le mea na tupu, na saunoa ai Judge Hobbs, toso faatātā atu e Fruean le teineitiiti i le tusa o le 6-7 mita i se vaimea i autafa o le vaitafe e lē iloa mai e nisi, ona ia faia faalua lea o ni faigaaiga faamalosi i le teineitiiti, ma ia tatu‘iina foi foliga o le teineitiiti e tau taofiofi ai a o ia faia i ai isi uiga matagā (oral sex). Saunoa le faamasino, e manino mai faamatalaga a le teineitiiti e matuā ogaoga lava āuga ua oo ia te ia ona o lenei mea na fai e Fruean ia te ia, ae o se mea e matuā “maofa” ai ona o le loto faamagalo o lenei teineitiiti i lea tagata.
I moliaga o Fruen i Ueligitone e faapea, na oo atu lenei alii i se fafine sa iai i le nofoaga e faatali ai nofoaafi, le Wellington Railway Station, ona tago lea ua fusi le fafine ma taumafai e lotelote susu o le fafine, ma faasolo ifo ai lava ona lima i totonu o le lausakeke o le fafine.
E laki ona sa vave ona maua se fesoasoani o le fafine mai tagata sa agai ane ma latou iloa atu le mea o loo tupu, peitai na avea lava lea mea na tupu ua oo ai i lenei fafine “lagona atuatuvale ma le lē toe saogalemu i nofoaga faitele”.
Na saunoa Judge Hobbs, o se lipoti na tuuina atu a o lei lauina le faasalaga, o loo faaalia ai, “le lē mo‘i o le salamō” o Fruean i tagata ia ua aafia i ana soligatulafono, na pau le itu lea sa popole i ai Fruean, o lona fia iloa pe fia se umi o le a faafalepuipui ai o ia.
Peitai o le ioeina e Fruean o ona moliaga ua taofia mai ai le teineitiiti lea na osofaia i Masterton mai ni lagona tiga a o faagasolo lea faamasinoga.
