Faamavae atu aiga ma uo i le tina ia Litarapasia Fanene Tamala

Ua fai sau mavaega i se tasi o pele ia te oe auā e lē iloa le aso e oo mai ai le maliu ma le oti? E faatalasua i luga o leitio ma talanoaga faasamasamanoa pe ua fai se mavaega a le tina poo le tamā i sana tautoga pe a malaga e ala i le maliu ma le oti, peitai atonu e lelei i se isi itu auā e lelei le lagona atu a o soifua pea, nai lo le tagi leotele i luga o le tuumagau ma maligi mea taugata ma laulau le alofa ua ova, ae ua lē o toe lagona mai e le tagata ua maliu.
Aisea la e te faatali ai ae lē talatalanoa loa i si au paaga ma e fai atu i ai “E gata mai le maualuluga o mauga i le maualuga ma le lapoa lapoa lava o lo‘u alofa mo oe Dear poo Honey.” E maimau na upu e tele e te toe saga faia pe afai e lē o lagona mai, ae lelei a ona fai atu i le taimi lenei ae lē o taeao, o loo faalauaitele lenei faamanatu mo tatou uma o loo soifua ma maua le ola.
E tele naua o tatou aiga ma ē uo pele ua momotu mafutaga mafanafana auā o le iuga lava o le tuugamau, aemaise o ni gasegase oso faafuasei, e lē gata o tamā, tina faapea foi nai fanau, ae ui a i lea o loo iai lo tatou faamoemoe i tua atu o le tuugamau pe afai tatou te faatuatua i le Atua.
O le aso muamua o Me na faamanavaina ai e le Atua galuega a se tasi o uso pele poo le tausi ia Litarapasia Fanene Tamala (Saleaumua Aleipata & Laulii i Samoa). Na faaipoipo atu o ia ia Tamala Samuelu (Taga Savaii) toatolu le fanau o Nari, Sam ma Sensi Tamala.
Ua atoa le tausaga talu ona faataotolia le tina ia Litara i le gasegase o le kanesa ma o se tina lototele ma filiga. Ua ea le taumafai o si ona alo ulumatua ia Nari e pei ona tini ai aoaoga i le Iunivesete a Grifith ma ua faigaluega nei. O le itu pito sili ona mataina auā na logotala loa nai ona uso ua faataotolia o ia i le gasegase, na faapea lava ona lei fulitua i latou ae auauai mai se‘i tausi i le taimi a o maua le soifua ma le ola.
Se mea ina a lelei o uso ae fealofani auā o le isi lea faamāmā avega ia Litara ona o le vaai atu i ona uso ua malaga mamao mai ma si ona tina ia Ma aemaise nai ona tuagane ma si ana fanau ia Nari, Sam ma Sensi, faapea Tomasi ma Joe.
Na faia ona sauniga faaleaiga i le po o le Aso Sa aso 4 o Me ae faataunuuina ona toe sauniga i le taeao o le Aso Gafua aso 6 o Me, sa faatautaia lava e faafeagaiga o le Ekalesia Aso Fitu Koneferenisi, Pr Ieti Ah Siu, Pr Sam Afamasaga, Pr Tusitina Faiumu, Pr Eteuati, Pr Tagaloa David Fanene faapea si ona tuagane ia Pr Aitui Fanene. Na iu manuia sauniga uma ma polokalame o toe taimi o le tina ia Litara e ala i le faatasi mai o le Atua.
Tau ina ia faamaise atu le agaga o le Atua i aiga uma faapea le tina matua ia Ma Fanene ma le nofoaalo aemaise le fanau a Litara.