O le fai soo o tatalo e foliga mai e lauga ai le tasi o sui a faipule o Salega ia Tapuai Toese ua faapea ona laga ai faitioga i le Palemene i le faagasolo ai o taualumaga i le maota.
O le alii faipule o se tasi o auauna a le Atua i le Ekalesia a le Aso Fitu o le Toe Afio Mai ma o le lagona o le Fofoga Fetalai e tuu ia te ia le tele o talosaga o le maota pe a mae‘a galuega o le aso ona o ia o se faifeau ma e tele ina ia saunia le tatalo mulimuli ma o tatalo nei e tele lava ina aofai ai talanoaga o le aso ma felafolafoaiga a faipule.
O le vaiaso la i ona tua atu na tele lava felafolafoaiga i le faitauga faalua o le tulafono taufaaofi o le Sitiseni poo le Tagatānuu o Samoa lea na alu le vaiaso o vevela ai finauga a sui o le Palemene.
Mae‘a loa taualumaga o le fono i le Aso Lulu toe tofi foi le afioga i le faipule e fai se tatalo e faaiu ai le fono a faipule ma sa tulai fiafia Tapuai Toese ma na ia aofai ai le tāua o le sitiseni ma ia faapea mai a o feagai ai faipule ma felafolafoaiga o lenei mataupu ia manatua o loo ua iai le sitiseni o le lagi o loo faatali mai mo sui a faipule, o le eseesega la e lē totogia se $4miliona tala e pei o le sitiseni Samoa ae ua mae‘a ona totogi i le toto o Iesu Keriso. Na faaauau ana lafoga ua peiseai ua lauga ma o le aotelega foi lea o felafolafoaiga o le aso ua unai i le tatalo.
O le aso na sosoo ai na tulai ai loa le alii Sui Palemia, Fonotoe Pierre Lauofo ma le faamatalaga o le tatalo a le sui o Salega ua lē talafeagai tele ma ia manatua o le sitiseni i le lagi e o faatasi foi ma le sitiseni i Seoli ae e leai la se tupe e totogia foi e alu fua ai lava le tagata.
Tulai le Minisita o le Matagaluega o Mataupu tau Tina ma Tamaitai Atinae o Nuu ma Aga Fesootai, le afioga Tolofuaivalelei Falemoe Leiataua ma faapea ane, ua lē fetaui tele tatalo a le alii faipule ma e tatau lava ona faasa‘o nei ituaiga lafoga ua faia i talosaga.
Na tulai foi le Minisita o Faamatalaga ma Fesootaiga Televavave Faaonapo Nei, le afioga Tuisugaletaua Sofara Aveau ma faapea mai o le mafuaaga lea o le agai o le atunuu i le lotu i le Aso Sa o le faalogologo i lauga a latou faifeau ae e leai se mafuaaga o le a tau lauga mai ai le alii faipule e lē o sana matafaioi lea.
Na faauilavea le alii Fofoga Fetalai ma talosaga faamalulu i sui a faipule ona o ia lava lea e tofia le alii faifeau, o le alii faipule foi e faatautaia tatalo ma na ia ta‘ua e mamā lava saunoaga ma lafoga a le alii faipule ma e lei iai sona manatu o le a toatamai ai le mamalu o sui o le Maota.
Na toe tali fuaitau le alii faipule fai tatalo ma faapea mai, o se upu ua aofia atu i tatalo o se aoaoga tāua lea mo sui uma ma e lē gata la o se tatalo ae o se lauga foi.
