O le toatele o uo ma ē masani, faapea foi aiga na lua, sa auai i le faamanatuina o le ta‘i 21 tausaga o le masaga ia Tamari ma Tamara i le faleaiga i le Happy Days i le afiafi o le Aso Faraile 7 o Mati, na leai se isi e lei maofa i le tapenaga sa iai lea faamoemoe ona o le matagofie o le teuina o totonu o le fale ao le keke foi na saunia mo lo laua aso fanau.
O le susuga i le faafeagaiga ia Tino Tioa o le Ekalesia o le Word of Life i Papatoetoe na taitaia le taulaga o le faafetai ma le viiga i le Atua e sula ai lona alofa ona o nei tausaga e tele ua foai i lenei masaga, ma ua avea ai foi o se isi laasaga fou o lea ua see atu ai nei tamaitai talavou.
Ae o le molimau a lo laua tamā ia Vai Tipi i le taimi na tuuina ai a laua ki, sa lagona ai le fiafia ma le malie o lea afiafi i le auvalaaulia, ae sa avea ma lui ma tapasa i o laua olaga talavou, ae faapea foi nisi o talavou sa auai. Na talatala e le tama uiga mālie o lana fanau i le latou mafutaga i totonu o le aiga. O le saunoaga a le tamā, o le 21 tausaga o le tama ma le teine talavou e lē o se mea e suia ai le olaga i le va ma mātua.
O le ki foi, ua ia ta‘ua o le laisene muamua poo le learner, o lona uiga o mātua lava latou te vaaia latou soo se mea e iai. Na sosoo ai ma le feulaina o le keke, ma faagasolo ai loa i le taumafataga. O le fofoga o le po o le tofa ia Laupua Tagialao, ma o ia foi sa fai ma fofoga o aiga na lua e molimolia le agaga faafetai i le mamalu o le auvalaaulia faapea susuga i faafeagaiga sa mafuta faatasi atu e patipatia aso soifua o le fanau, ae o le tofa ia Tupai Saeni na fai ma sui o le ekalesia o le Word of Life ma Samoa potopoto e tali faitau i lea saunoaga o le tootoo o le po.
O le tamaitai matua o lenei masaga o Tamara, ma o ia lea o loo nafa ma le tausiaina o si ona tina (grandma) ae o Tamari o loo faigaluega e fesoasoani i nai ona mātua mo lona aiga, ma o le saunoaga a le tamā ia Vai o le amataga o lenei vaiaso o le a malaga atu ai i Samoa e faatafafao ai lana fanau auā lo laua aso fanau.
O le fiafiaga tele foi i mātua ia Vai Tipi ma Mema Tipi ona o galuega lelei a le fanau i totonu o aiga, ma ua la naunau ai lava e fai se mea lelei mo laua.
