O le tautua faaauau pea a le afioga ia Galumalemana Tai Galumalemana, ma lana faletaavale o le G-Mana Wholesale Autos i Papatoetoe, o se tautua ua faamalieina ai le atunuu ona o lona lagolago i soo se mea e faatinoina i totonu o lenei atunuu aemaise lava o vaega e ta‘ua ai Samoa. O upu a le atunuu, “Ua lē tasi ae ua lasi” ona o le manatu ia Samoa ma ona tagata. O le Aso Toonai ua mavae, 8 o Setema na faataunuuina ai foi se polokalame i totonu o le faletaavale o le G-Mana i Papatoetoe e faatatau mo tamā uma o Samoa. Na tumutumu le lotoā i lea taeao i tamā ma tina faapea foi fanau i le molimauina o lenei foi faamoemoe.
O le tofa ia Seumanu sa fai ma fofoga o le aso, ae o le susuga ia Willie Tavita ma ona alo sa faafiafia ai, faatasi ai ma le susuga ia Tala Pauga ma Wayne. Sa vaaia le faafiafiaina o nisi o tamā matutua i lenei polokalame ona ua maua foi se avanoa e mafuta ai ma le alii pule o le faletaavale le afioga ia Galumalemana Tai Galumalemana.
E 20 tamā sa faamanuiaina i le Se‘i o lea aso ma sa maua ai ni a latou faailoga tupe e ta‘i $50.00, ma sa faapea ai foi ona tufaina ma lole mo le fanau. O le aso foi lea sa toe faafofoga ai le atunuu i le pese e faatatau i le tautua a le faletaavale o le G-Mana, na fatuina e le afioga ia Toleafoa Joseph Galumalemana. Sa leai foi se fia toatele o le atunuu na auai i le tele ma le vevela o le bbq na saunia lava e le aufaigaluega.
O le taufaaiuiuina o le polokalame, ae ulufale atu loa ma le afioga i le tamaitai faipule, Leaufaamulia Asenati Lole-Taylor, i le fia auai foi ma molimau faatasi le aso ua atofaina e le G-Mana mo tamā uma.
Sa ia saunoa faafetai foi i le pule o lenei auaunaga ona o lona vaai ia Samoa ma ona tagata, faatasi ai ma lana faamanuiaga i tamā uma sa auai. Sa faapea foi ona faaleo le agaga faafetai a le alii pule ia Galumalemana Tai Galumalemana i le atunuu ona o le lagolago i lana tautua, ma faamanuia ai foi ma le Aso Sa o Tamā.
