Na atofaina le Aso Sa muamua o Setema o se aso faafetai lea i totonu o le Matagaluega EFKS a Kuiniselani. I se ripoti na tuuina mai e le faletua o le galuega (Binary Reupena) e faapea o le Aso Sa ua tuanai, sa saunia ai se Lotu faafetai ina ua tali le Atua i talosaga ma ua taulimaina pepa o le fanua (40 eka i Tarra) auā le lumanai atiae o le Matagaluega.
Sa faia lea faatasiga i le malumalu o le Atua tapuai a le Ekalesia EFKS Ipswich lea o loo tausia e le susuga i le Toeaina Faatonu ia Rev Elder Kerita Reupena ma le faletua ia Binary Reupena.
Ua tini pā‘o le uto – ua faamalieina le Iugafono a le Matagaluega sa faia i le tausaga 2010. O se aso fiafia tele mo le Matagaluega ina ua mafai ona latou a‘ea faigata – ae ua lē tia‘i i le ala ana Iugafono. Ua maua foi lea fanua tele e aunoa ma se aitalafu e pei ona faamae‘aina ai tau o le fanua i le Aso Tofi, 4 Setema 2014. O le aso faafetai i le Atua ona o lana faatoaga loto – o loo tutumau i le soifua tautua ma le faitaulaga i le Atua. O taulaga e le gata mo Samoa ae o le faamautuina o nofoaga mo le galuega a le Atua i lenei atunuu.
Ua talafeagai foi lenei faamoemoe ma le faamanatuina o le taunuu o le Talalelei i Samoa i le 1830, le taeao nai Mataniufeagaimaleata, e pei ona faamanatuina i le Aso Sa muamua o Setema e le EFKS i Samoa ma atunuu i fafo.
Sa faatinoina foi se tala “Taunuu o le Talalelei i Samoa” mo le Matagaluega e Tupulaga & Aoga Aso Sa EFKS Ipswich. Sa matagofie foi Pesepesega a Tupulaga EFKS Northside e faamanuia ai lenei Aso Sa ua faapitoa mo tamā o le Matagaluega lea sa amataina i le ta o le 10 i le taeao o le Aso Sa aso 7 o Setema.
Na ta‘ape le filialii ina mae‘a le taumafataga ae maualuga pea le viiga o le Atua. “Aua ne‘i ia te i matou le Alii e, a ia tuuina atu le viiga ona o lou alofa ma lou faamaoni.”
