E lē o faigofie taumafaiga a aulakapi filifilia a le atunuu mo tausinioga faavaomalo o le a auai amata atu i le masina fou o Iuni. O le Manu Samoa, le Manusina, ma le au lakapi taitoafitu faapea le aulakapi mo tama talavou e i lalo o le 20 tausaga le matutua.
O Iuni o le a faia ni taaloga faavaomalo a le tatou Manu Samoa e pei ona amata i Iapani ona sosoo ai lea ma taaloga i Samoa ma le ‘au malosi a Tonga o le Ikaletahi, faapea le taaloga ma le ‘au malosi a Italia.
O le Manusina le aulakapi a tamaitai o le a fetaui ma le ‘au a tamaitai sili ona malosi le siamupini o le lalolagi le Black Ferns a Niu Sila i le masina fou, o se taaloga tala malae a o lei faia le taaloga faitaulia a le Olopeleki ma le ‘au a Egelani. O se isi taaloga lelei mo le tatou Manusina a o sauni i le Ipu o le lalolagi e faia i Farani.
O le aulakapi taitoafitu e ui ina faaletonu pea ana taumafaiga i le taamilosaga ua mae‘a atu nei a le IRB ae ua sauni i le tausinioga mo se pine auro, se siliva poo le apa memea i taaloga a Malo o le Taupulega poo le Commonwealth Games e faia i Glasgow i Sikotilani Peletania.
O se isi lea tausinioga lakapi faavaomalo o le a faia i le masina o Iulai e tāua mo Samoa a o sauni ai aulakapi taitoafitu o le a maua avanoa e tausinio ai i taaloga a le Olimipeka.
O le tatou aulakapi e i lalo o le 20 tausaga i le vaega o alii talavou na tuua le atunuu mo Niu Sila i le vaiaso ua mavae mo le taamilosaga o le Ipu a le lalolagi e faia i Niu Sila i le masina fou o Iuni ma o se isi lea taamilosaga tāua tele i le kalena o fuafuaga a le Iuni lakapi a le atunuu auā o le a saili ai le tulaga lelei ma le mualuga o loo iai le atinae o le taaloga i le atunuu mo tama talavou e i lalo o le 20 tausaga poo le under 20.
O le faalauiloaina o nei taaloga faavaomalo ma le auai o Samoa na aloaia i se sauniga a le iuni lakapi aoao a le atunuu sa saunoa ai le taitaifono o le iuni le afioga i le Palemia susuga Tuilaepa L Sailele Malielegaoi.
O se faamoemoe foi ua malaga mai ai ma le alii faasalalau lauiloa i televise a Niu Sila o John Campell mai le TV3, e faia sana polokalame e fesoasoani i taumafaiga a le iuni lakapi ma le atinae o le taaloga, e pei ona autu lea polokalame televise i le finauina o le iuni lakapi a Niu Sila ina ia faia se taaloga a le Olopeleki i Samoa.
Fai mai le alii o Campell o se suesuega na faia na iloa ai o le 93 pasene o tagata na fesiligia i Niu Sila e fulisia lo latou manatu i le tatau ona faia se taaloga a le Olopeleki i Samoa.
O se isi lea vaega o le faalauiloa o le kalena o polokalame a le iuni lakapi a Samoa ua faafetaia ai e le taitaifono le alii faasalalau mai Niu Sila ona e lē o uma lona save‘u o le mataupu lenei faasaga i le iuni lakapi a Niu Sila, ina ia mafai ona faia se taaloga a le Olopeleki i lo tatou atunuu, ae talosia ia tafa ai le finagalo o le pulega o le iuni lakapi a lea atunuu.
