O upu a le atunuu e tofu lava le lou ma lona fuata ma e moni lea i le itu tau koleniga ma faamalositino ua taatele nei i Sini o le Zumba. O lea ituaiga siva e tele na faaaogāina ai musika latina ma pese vavave e fetaui ai taga o lenei faamalositino. E gaioi uma ai vaega o le tino mai tumuai seia oo i tamaivae.
Ua molimauina le faigofie o le faataitaiga e soo se tagata laitiiti agai atu i tagata matutua. Pau lava le fofo pe a gase ma sela o le malolo mo nai minute toe faaauau ai a o la e alu lava le au malolosi (fit).
O se faamalositino ua fai ma ma‘oi o isi auā e pei lava o la e siva ma ua vaaia foi nisi ua tele suiga i o latou kilo ma le mamafa sa iai. Ua faia foi e nisi o aiga potopoto i tuafale, faletaavale faapea i paka ma nofoaga taalaelae.
E lē gata i lea o nisi o falefaigaluega ma ekalesia ma autalavou e foia ai le tino puta ma gasegase masani.
I se tasi o auaunaga Samoa i Sini le Divine One Nutrition i Hamel Rd, Mt Pritchard o loo faagasolo nei sa latou lu‘i mo le ono vaiaso (6 week Challenge) e na o le $10 le resitala ae manumalo i le $500 pe a uma ifo le ono vaiaso ua tele ou kilo ua toesea.
E fā aso o le vaiaso e fai ai le Zumba e lenei pisinisi ae pule lava le sui i ona taimi faaopoopo i taimi paganoa. Saunoa le alii o Fraser Masinamua (trainer) lea sa taalo i U20 a Parramatta Eels faapea Cronulla Sharks, e aogā mo talavou faapea soo se tasi e oo lava i tagata matutua.
E lē gata o le puipui mai gasegase o le suka, toto maualuga ae faapea foi le tino gagase ma le tino puta. Ua faapea foi ona taatele lenei koleniga i Samoa ma fesoasoani tele i le vevela o le tau e faagaioi ai sui o loo moomia lava le toesea o kilo.
O le luasefulu tausaga talu ai na lē iai se avanoa faapenei e aofia uma ai soo se tagata i koleniga taatele faapenei a o lea ua faaaogāina e le toatele ua loa o latou soifua ma ua atili maua ai foi le malosi ma le mānava e soifua ma faigaluega ai.
