Faigata ona agai fai faatoaga maketi a Amau

Ua iai le maketi lelei i le taulaga ua tatala e faaaogā e le aufaifaatoaga ma le aufaipisinisi laiti, ae o le luaselau o poloka ma le aulelei o laulau uamea fola i le apa siliva i le maketi a Amau, e leai ma nisi o faaaogāina talu mai le uluai aso na tatala atu ai lea nofoaga matagofie i le atunuu faipisinisi ma le au faifaatoaga.
Ua faaalia e nisi o le atunuu o loo faaaogāina le nofoaga lē tumau i Fugalei poo le maketi a Toleafoa, e ui e lē faatusalia le maketi ua tatala i le nofoaga o loo latou faaaogāina i le lima tala i le aso le totogi o le poloka, ae ua sili atu lea mo latou auā e taugofie ae ua masani ai foi tagata, ma le isi itu o loo agai atu i ai pasi la‘upasese.
O le maketi a Amau o loo faigata ona afea ona o loo fausia se isi fale tele i le fanua lava o loo iai lea atinae lata i le auala autū o loo iai le faleoloa tuai o Amau lea o loo uia e pasi ma le tele o taavale faapea ma tagata.
O loo lagolagoina e le malo le tulai mai o le maketi fou ua fausia e le kamupani a Amau, ae o le fuafuaga i le toe fusia o le maketi i Fugalei ona o le toomaga o tagata lautele o atinae e maua ai se faamāmā avega mo latou i le totogi e faaaogā ai.
O le maketi e lima miliona le tau i Vaitele-tai, o loo vaaia pea i aso uma le faaitiitia o tagata ua latou faaaogāina, aemaise e lei afea lava e ni pasi la‘upasese pe tumutumu foi i ai le atunuu mo ni faatauga.
O nisi o le aufaipisinisi sa lisiina nisi o faleoloa ma poloka o le maketi ua toe solomuli ona o le lē lelei o tupe maua e mafua i le leai o ni tagata faatau.