100 taaloga a Sefo Pasina mo le Kalapu Lakapi Ponsonby

O se tasi lenei o matatia ausia gata tele e le toatele o tagata taaalo i soo se taaloga, o le ausia o ni taaloga se tele mo se kalapu e taalo ai, ma e toaitiiti lava nisi latou te maua lea faamanuiaga. O avanoa faapea e matuai faamauina i faamaumauga o talafaasolopito o lea kalapu pe a mafai e se tasi ona ausia lea tulaga maualuga.
O le faaiuga o le vaiaso na se‘i mavae atu nei, sa faataunuuina ai le taaloga i le va o le kalapu lakapi a Suburbs ma Ponsonby i le taamilosaga o ‘au sinia Premier i le malae Shaltbolt Park i Green Bay.
O se vaaiga mataina tele lea taaloga, ma o le taaloga foi lea na atoa i ai le 100 taaloga a se tasi o alo o le atunuu ia Sefo Pasina mo le kapalu lakapi a Ponsonby.
O se alii e mataina tele le tomai i le faatinoga o le taaloga aemaise lava i le laina pito i luma poo le forwards. Na amata taalo mai lava Sefo i Samoa i le kalapu a Malisi i Samoa, sosoo ai ma le malaga mai i Niu Sila nei ma faamautu ai ma lona aiga. E iai se taimi na malaga ese atu ai i Ausetalia ma le faamoemoe e faamautu ai peitai sa lē mafai ona taunuu lea fuafuaga ma toe taliu mai ai lona i Niu Sila ma faaauau ai le soifua taalo mo le kalapu lakapi a Ponsonby.
Na mae‘a le taaloga i lea aso ona alo atu foi lea o le kalapu lakapi a Ponsonby e faaalia le agaga faafetai i le tautua taalo o lenei tamalii ia Sefo Pasina mo Ponsonby, ma faamauina ai foi lona igoa i talafaasolopito o lea kalapu i Niu Sila.
Na faaiuina i le fiafia tele sa faia faapitoa mo Sefo i lea afiafi. O se tasi o tulaga mo le silafia, ua tofia nei foi le alii ia Sefo Pasina e avea ma Faiaogaulu mo le Kalapu lakapi Marist (Samoa) i le taamilosaga lakapi a le Aukilani Samoa i Niu Sila mo le tausaga nei 2013.
Talosia le tulai mai o lenei tamalii e faasoa atu lona tomai i alo ma fanau a Samoa i lenei lava taaloga o le Lakapi ua lauiloa ai Samoa i le atulaulau.