I le tulaga faaluafesasi sa iai le Au-lakapi a Aukilani i lalo o le pulega faafaiaoga a Pat Lam i le taamilosaga talu ai, ina ua le ausia le tulaga mataina ua masani ma ta’utaua ai Aukilani, e ui ina ua taunuu ile faamaloloina o Pat Lam mai le tulaga faafaiaoga ae oloo maualuga pea le talitonuga o atunuu i fafo i le toma’i ma metotia oloo faatinoina ai le taaloga, ua sainia ai nei le konekarate e lua tausaga ma se kalapu lakapi i Aialani ma ua tofia ai i le tulaga o le faiaoga ulu.
I le tofia ai o Pat Lam ua suia ai le alii faiaoga sa iai o Eric Elwood.
O le ulua’i avanoa muamua lea ua tofia ai Pat Lam talu ona ia tuua ma faamalolo mai i le tofiga faiaoga-ulu mo Aukilani.
O se lu’itau e mautinoa e fiafia iai Pat Lam e taliaina e ui oloo tumau pea sootaga ma le Au-lakapi a Samoa i tulaga faa faufautua.Na ia taua i se tasi tusitusiga i le intaneti i le vaiaso nei, ua lagona le agaga fiafia i lenei tofiga ma ua fuafua foi e faimalaga iai ma lona aiga i se taimi o le tausaga nei.
Talosia ia le valaauina o lenei alo o Samoa i Aialani e atili siitia ai pea Samoa i lenei lava taaloga o le lakapi i soo se vaega o le lalolagi.
