Faia aso faapitoa o Aoga

O le Aso Tofi o le vaiaso lenei ua faatino ai se aso ua ta‘ua o le aso mo tagata lautele. O se aso ua tatala ai faitotoa o aoga uma a le Malo ina ia mafai ona faalauiloa le tulaga ua oo i ai aoaoga a le fanau i le mae‘a ai o le kuata lona tolu ma ua agai i le kuata lona fā o aoaoga.
Ua iai foi ma le taumafaiga ina ia faalautele le malamalama o mātua ma aiga e agai atu i lea aso faapitoa i le tulaga o iai lea aoga ma lea aoga. O ā polokalame faagasolo mo aoaoga a le fanau o loo faatino ae o ā suiga o tamaiti uma talu mai le amataga o le tausaga.
Faaalia e le Ofisa Sili o Aoga le afioga Matafeo Falanaipupu Tanielu Aiafi, ua tele lava ina tauave na o le komiti a aoga ma faiaoga le galuega lenei o le aoaoina o le fanau ae o se galuega e fai faatasi. O le faafitauli na ia ta‘ua ona e tasi lava le aso o le kuata, le aso mulimuli lea e agai atu ai mātua poo aiga foi o fanau aoga ma ave i ai lipoti o le fanau.
E na o ni nai minute lava ua faaavanoa e faatino ai le feiloaiga lenei a le faiaoga ma le matua ona o le tele o taimi e tele foi tuatuagia o matua ma e laititi le taimi e mafai ona nofo atu ai e faatalanoa le tulaga o iai suiga o taumafaiga a le fanau.
O le aso faapitoa lenei ua ta‘ua o le Community Day, ua lē gata la i le tulaga o iai lipoti a le fanau ae o fuafuaga uma lava a aoga aemaise faaaliga o tu ma aganuu faa-Samoa ua faatautaia uma lava i le aso lea e tasi.
O le faamoemoe o le Matagaluega o Aoga, Taaloga ma Aganuu ina ia faatautaia lenei aso e tasi i tausaga taitasi ma ua tele aoga ua sauni foi mo lenei faamoemoe i lenei vaiaso. Ua iai nisi aoga ua tuu atu a latou faafiafiaga faaleaganuu i lea aso ma ua valaaulia tusitala e agai atu e molimauina ma ua faamalosia i aoga uma lava a le malo lenei taumafaiga.
O nisi aoga ua faia faaaliga a vasega taitasi e ala i galuega faatino a le fanau ma ua iai foi lava i latou o sui o komiti o aoga ua sauni ripoti o le faatautaiga o galuega faaleleia o faleaoga ma totoga moomia a aoga lea e taloina ai foi le lagolago a mātua i tausaga taitasi.