Saili se igoa fou faatoa talia ai ekalesia LMS Toe Fuataina

O le tetee a le ekalesia EFKS latou te lē talia le avea o le ekalesia LMS Toe Fuataina ma sui o le Fono a Ekalesia Soofaatasi ona o faailoilo i le igoa o loo faaigoa ai, ua lagolagoina e le komiti faafoe a le Fono a Ekalesia Soofaatasi.
O lea finagalo ua faapea ona fautuaina ai le LMS Toe Fuataina e saili se isi igoa e faaaogā e lesitala ai, ona faato‘ā talia lea e avea ma sui.
E lua itu o lea ekalesia ua vaeluaina peitai e tasi lava le igoa o loo latou faaaogā. O le isi itu na talia i le tausaga ua mavae, o le avea ma sui o le Soofaatasi a ekalesia kerisiano i Samoa, a o le isi na faatoa tuuina atu i le masina na tea nei so latou manao ae momoli aloaia atu le latou talosaga tusitusia i le Aso Tofi na tea nei lea na fono ai le komiti faafoe a le Soofaatasi ma faapea ona tagofia ai le mataupu i le tusi tetee a le EFKS.
O le mae‘a o lea fonotaga na maua ai se fesootaiga i le failautusi aoao o le Fono a Ekalesia Soofaatasi le susuga i le faifeau o Ma‘auga Motu.
O lana faamatalaga mai, ua fautuaina itu e lua o le LMS Toe Fuataina o loo vaeluaina, ina ia saili se laolao e toe faatasia ai.
O le matagofie foi lea o le avea ma sui o le Soofaatasi ae ua toe tasi le ekalesia e pei ona sa iai muamua.
Peitai e lē o se mataupu e oo i ai se malosi o le fono a ekalesia ona e fitoitonu i le lotoifale o le LMS Toe Fuataina. Na pau le mataupu ua agai i ai se finagalo o le tetee a le EFKS na fautuaina ai lea ekalesia e agai e saili se isi igoa ona o atugaluga o le EFKS na folasia e le failautusi aoao o lea ekalesia i luma o le komiti faafoe i le fono i le vaiaso na tea nei.
Faaalia e Ma‘auga e lē o manino tonu le komiti faafoe i le finagalo o le failautusi e faapea o loo iai faailoilo o le igoa LMS Toe Fuataina e lē talafeagai. Peitai e lē o ma‘oti atu se finagalo o le failautusi poo ā tonu faailoilo.
O le vaiaso nei o loo fuafua e oo atu ai lea ekalesia ma se isi igoa fou, ae e lē o mautu foi lea tulaga ona o loo iai se iai matega atonu e oo le finauga i le igoa i le tulafono.
O le faaaliga a le susuga Ma‘auga Motu, ua faailoa atu e le LMS Toe Fuataina ua uma ona oo a latou sailiga i Peletania ma faailoa ane ai e lē o toe iai se LMS i Samoa.
“Ou te leiloa la poo a faailoilo ia o loo talanoa mai ai le failautusi aoao o le EFKS”, o le saunoaga lea a le failautusi o le Fono a Ekalesia Soofaatasi.