Ua tautino le afioga i le Palemia, ua avea lona alofa i tagata faipisinisi laiti o loo faatau solo i luma o faleoloa i le taulaga a latou oloa, ma tulaga ua sese ai lana faaiuga. Sa toe faaauau ia faatauga o oloa i le tuanai ona faatino e leoleo se galuega i le tausaga ua mavae na aveesea faamalosi ai ia pisinisi laiti mai luma o faleoloa ma auala savali o loo lumafale ai nisi o ofisa ma faletupe i le taulaga.
Na faia lea galuega ona o aiaiga o le tulafono o loo faamalosia e leoleo ma le Matagaluega o Puna‘oa Faalenatura ma le Siosiomaga. I le feiloaiga a le Palemia ma tusitala na ia faaalia ai, o auala tetele na faia e feoai ai taavale, o auala savali na fausia mo tagata e savavali ai, a o maketi na fausia e ave i ai soo se oloa ma fua o faatoaga e faatau ai.
Ua toe suia nei le fati a le Palemia ma ua ia lagolagoina le sese o le mea o loo vaaia nei i luma o polotito o nisi o ofisa ma faletupe i le taulaga, ina ua amata ona faatino galuega o tapenaga mo le fono a malo laiti o le lalolagi lea toe lua masina ma vaiaso ona usuia lea i Samoa.
O le matagaluega o puna‘oa faalenatura ma siosiomaga lea ua nafa nei ma le aveesea o nei pisinisi ona o se tasi lea o vaega o loo aiaia ia latou tulafono faatonutonu. Ua tuu avanoa nei le matagaluega ia i latou o faatau solo i luma o ofisa ma faletupe ma isi pisinisi tetele i le taulaga ia aveesea a latou oloa i totonu o le masina atoa, a o lei faataunuu le malosi o le tulafono e ala i le aveesea faamalosi.
O loo fausia pea le maketi o le Malo i Fugalei e lē o iloa se aso e mae‘a ma tatala ai mo le faaaogāina. Ua iai le maketi a Ah Liki i Fugalei ae e lē gafatia e nisi o le au faipisinisi laiti le totogi o poloka ma lisi o faleoloa.
Ua tumu le maketi a Toleafoa, ae e lē o fia o le aufaioloa ma le aufaifaatoaga i le maketi i Vaitele ona e leai nisi toatele e agai i ai. O le maketi a Ah Mau e leai foi nisi o fia agai i ai ona e leai ni pasi e afea ma leai ni tagata se toatele e afea lea nofoaga.
