O se tasi lenei o polokalame o loo malosi lona faatāuaina a le Ekalesia, ona e mo le faalauteleina o le malamalama ma le iloa e alo ma fanau o le Tusi Paia, ae o le autu ina ia mafana le mafutaga ma lo latou Alii Faaola o Iesu Keriso.
E lē o se tauvaga e iloa ai poo ai e sili lona poto, ae e fia faamanatu i alo ma fanau a le Ekalesia, a e lē suesue ma fai au meaaoga, e lē pasi lau suega, e tutusa lelei ma tapenapenaga mo aoga maualuluga o loo aooga ai, faapea foi ma nisi o suesuega e feagai ma le olaga.
I soo se tusipasi ma soo se matata, e tāua le suesue ma toaga e fai meaaoga, ae lē o le faasaga i le TV ma le computer games i le aso atoa.
O le malumalu o le taitai o Melepone o le sui taitai foi lea o Ausetalia atoa le susuga ia Apouani Unasa ma le faletua ia Olevia na faataunuu ai le faamoemoe. Na auai alo ma fanau mai falelotu e ono a le Ekalesia.
Na amataina i le sauniga lotu, ona alo lea o fanau mo a latou suega, fai le faamalositino ma lau ai ma le iuga o suega. Na maualuga le viiga o le Atua silisiliese, ona o le faatāuaina e alo ma fanau o nei polokalame faaalualu mo so latou tuputupu manuia a o ola ai i nei atunuu e tumu i tofotofoga ma faaosoosoga.
Momoli atu ai faamanuiaga a le Samoa Times mo alo ma fanau uma a le Ekalesia, ia iai Aao Faaola o Iesu Keriso i lo tou taumafai ma le feagai ai ma aoaoga.
Faafetai faapitoa mo le tamaitai ia Sharon Schwenke o le alo o le Ekalesia, mo le pueina o ata o le faamoemoe.
