Mataio 25:46 ‘Ona o atu ai lea o i latou na i le sala e faavavau a o e amiotonu e o atu i le ola e faavavau.’
O Kaino ma Apelu o atalii uma o Atamu. Sa filifili Apelu e faafiafia le Atua, o Kaino sa filifili e fasioti lona uso. O Aperaamo ma Lota e aiga, ae sa filifili Aperaamo e faatuatua i le Atua, ae filifili e Lota le matagofie o Sotoma.
O Saulo ma Tavita sa fai uma laua ma tupu o Isaraelu. Sa filifili e Tavita le Atua, ae filifili e Saulo le pule. O Peteru ma Iuta o soo, sa la faafitia uma Iesu, ae mulimuli ane filifili e Peteru le salamō, ae filifili e Iuta le pule i le ola.
O loo i totonu o le Tusi Paia le tele o aoaoga e tuuvanoa ai le Atua i le tagata ia filifili mo lona taunuuga. Sa matuā manino i saunoaga a Iesu faapea, o le ala lautele ma le ala vaapiapi, o le faitotoa e vatele ma le faitotoa e vaapiapi.
O le tagata e fau le fale i luga o le papa, ma le tagata e fau i le oneone. O le tagata e auauna i le Atua ma le auauna i le mamone. O le tagata i le lafu mamoe ma le tagata i le lafu oti.
Ae taualuga e le tatou matua autū, o ē o atu i le sala e faavavau, ma e o atu i le ola e faavavau. Ua aumai e le Atua le faitalia e filifili ai le tagata, ae o nei filifiliga e iai ona taunuuga e lē mafai ona sosola mai ai.
E tele taimi tatou te faaseā ai pe a lē iai ni avanoa e filifili ai se mea e te manao ai. E ita pe a lē tuu atu e fai lau lava faitalia tusa ma mea e manao ai.
Pei o le tagata e fai ma au uō, poo mataupu o le aoga e te fiafia ai, ma le anoano o filifiliga mai lea taimi i lea taimi.
O pagotatā sa faasatauro faatasi ma Iesu, e tutusa uma laua le solitulafono. Molia ma faamaonia uma a la solitulafono. Sa siosiomia uma laua e tagata i le taimi e tasi o le faasalaga, ma tutusa lelei foi lo la latalata ia Iesu i lea taimi, ae eseese a la filifiliga sa fai.
O le isi i le itu agavale sa upu leaga ia Iesu, a o le pagota sa i le itu taumatau sa vavao atu ia te ia ma faapea; ‘E te lē mata‘u ea i le Atua, ina ua tatou sala faatasi? Ua tonu la ta sala; aua ua tauia mai ia i taua e tusa ma mea na ta faia, a o ia lenei, e leai se le tusa na faia e ia.’
Ona fai mai lea o ia ia Iesu; Le Alii e, ia e manatua mai au, pe a e afio i lou malo. Ona fetalai atu lea o Iesu, ‘E moni ou te fai atu ia te oe, o le aso ta te faatasi ai ma oe i le parataiso.’
Na maua uma e laua uma nei avanoa e filifili tonu ai. Sa tuuavanoa i ai le Faaola, filifili e le isi le salamō, ae filifili le isi e taufaifai. E lei taofia e le Alii laua mai a la filifiliga, ae sa selesele uma foi laua i le iuga o a la filifiliga sa fai.
E tele mea sa tatou fetaia’i ma ui ai e aunoa ma ni filifiliga sa fai iai, poo mea sa tutupu e le oo iai so tatou iloa poo se malosi. E te lei filifili ia e soifua mai o oe o se alii poo se tamaitai.
E te le i filifilia foi ou matua e te soifua mai ai. E te lei filifilia foi ou uso ma tuafafine poo tuagane. E lei iai foi sau tala e fai poo afea e te fanau mai ai, pe fai oe ma Samoa pe leai.
Ae tele foi filifiliga sese ma le le tonu sa tatou fai. Atonu o au filifiliga ua e mafatia ma pologa ai. Poo ni faaiuga sese e oo mai i le taimi nei o loo e feagai ai pea ma ni tigā ma mafatiaga.
Pei o le pagota sa i le itu taumatau, sa tele mea sese sa ia fai. Sa feoai ma tagata lē taupulea, ma amio ai faaletaupulea. Sa soona fai le olaga ma oo ai i puapuaga, ma le faasalaga e tatau ma amioga matagā.
E tatau i ai le sala ma le faafanoga e faavavau e pei o le matua autū. Ae tasi le filifiliga sa‘o ma le tonu na suia ai lona taunuuga, ma faaleaogaina ai lona tuanai matagā.
E tele ana filifiliga sese sa fai, ae ina ua oo mai i le filifiliga taua a le tagata, sa filifili Iesu. Ona suia lea o lona matagā e fai ma matagofie, suia le oti e faavavau i le ola e faavavau, ma suia le malaia i le manuia, ona o le filifiliga sa‘o.
Sa iai le faitalia i le pagota i le itu agavale e filifili ai. Sa soona ulavale. Sa soona fai le olaga. E lei taofia e Iesu lona taufaifai ane, sa tuu pea e fai, auā o lana lea faitalia ma lana filifiliga. E lei faasala foi i ai Iesu, ae o lana lava filifiliga, sa noatia ai o ia i le sala e faavavau.
E matautia le amiotonu ma le alofa o le Atua. Ua tuu mai ia tatou le avanoa e filifili ai e tatou le taunuuga o lo tatou ola, mai lava i le amataga, ua valaau, “Ou te valaau i le lagi ma le lalolagi i le aso nei e fai ma molimau ia te outou, ua ou tuuina atu i ou luma o le ola ma le oti o le manuia ma le malaia; o lenei ia e filifili i le ola, ina ia ola ai oe ma lau fanau.” (Teuteronome 30:19) Samoa e, filifili nei Iesu, Soifua.
