“O lipoti lelei ma lipoti leaga, o meaai o le mafaufau”…Tuilaepa
Ua lealea atu nei i tulu‘iga o le lalolagi tala o le faatuina o se isi faalapotopotoga fou ua avea nei ma itutino o tagata o galulue i faasalalauga tumaoti e finauina pea le faatumau o le tutoatasi o le saolotoga o galuega faatusitala i le Pasefika.
O Samoa ua avea ma atunuu o le Pasefika ua faatu ma lesitala ai nei lea faalapotopotoga fou ua faaigoaina o le Pacific Media Association poo le PacMA.
“O Samoa o loo saoloto ai le au tusitala i le faiga o le latou galuega.
O lipoti lelei ma lipoti leaga o meaai o le mafaufau”. O le finagalo lea o le alii Palemia, Susuga Tuilaepa Lupesoliai Sailele Malielegaoi, ina ua ave i ai le avanoa e le sui taitaifono o le PacMA o Kalafi Moala mai Tonga e faia ai sana saunoaga puupuu, i le fiafia sa faafetaia ai tusitala ma pule o nusipepa, televise ma leitio i nisi o atunuu o le Pasefika ua latou faatuina le faalapotopotoga fou ua iai nei.
O le laulau o faatonu ua filifilia e tauaveina le taitaiga o le PacMA, mo le taimi amata o le taitaifono, Savea Sano Malifa, o le pule faatonu o le nusipepa o le Samoa Observer.
O Kalafi Moala mai Tonga o le sui taitaifono, ae failautusi ma teutupe le pule o le Cook Island News le alii o John Woods, sa avea ma sui peresitene o le PINA, ae ua faamavae ona ua lē mafai e lea faalapotopotoga ona finauina le noatia o le saolotoga o tagata tusitala e faia ai a latou galuega i totonu o Fiti.
O isi sui o le laulau o faatonu e lagolagosua i taitai ua filifilia e aofia ai le tamaitai o Ana Currie mai Hawaii, Autagavaia Tipi Autagavaia, o se tusitala galue tutoatasi poo se freelance journalist, Apulu Lance Polu o le Talamua Media, ma George Pitts o se alii mai le Atu Kuki ae e iai ona piitaga i Samoa lea ua na faagaioia le TV o le Star Television ma le leitio StarFM o loo i Levili i Matautu-tai i Apia.
I le faasalalauga mai le laulau o faatonu i le mae‘a o le latou fonotaga i le vaiaso na tea nei, na faaalia ai le sauni o se sāvali e alu i Fiti pe a talia e feiloai ai ma le Palemia o lea atunuu o Frank Bainimarama e soalaupule le faaiuga a le malo faafitafita ua noatia ma saisaitia ai le saolotoga o galuega faatusitala i lea motu o le Pasefika.
“ E lē solomuli le faalapotopotoga mai le faia o gaioiga talafeagai uma mo le faatumauina o le saolotoga o tagata faasalalau i Fiti”, na saunoa ai le taitaifono filifilia le afioga Savea Sano Malifa.
