“Ua pei a‘u o se tagata faigaluega a le Malo e leai so‘u aogā”
E lē o talia gofie e le faauluuluga o le vaega o auaunaga faafomai i le Matagaluega o le Soifua Maloloina le faaiuga a le Komisi e pulea tagata faigaluega a le Malo, e faamalolo lē tumau o ia, ae se‘i faatino suesuega i tuuaiga o le faaaogā sese o le pule ua tulai mai ai ni feteenaiga ma faaletonu i le va feagai ai o le komisi le PSC (Public Service Commission), ma le vaega o le National Health Service sa faauluulu i le alii fomai o Dr Stanley Dean.
I le faia ai o le faaiuga e faamalolo pe suspend le alii fomai ae faatalitali le taunuuga o suesuega, e lē o mautinoa lelei le lumanai o le alii fomai ma lana galuega pe toe faafaigaluega pe o le a faamutaina.
O se lipoti a le komiti faatonu a le National Health Service (NHS) o loo ta‘ua ai faaletonu e faasino i le taitaiga a le alii fomai o Stanley Dean, o le mafuaaga lea o le faia o le suesuega. Peitai ua faailoa e le alii fomai lona faanoanoa i le faaiuga ua faia ia te ia, ona o loo iai lona talitonuga e leai se mea ua sese i lana pulega.
Ua toe faamanatu ai e le alii fomai lona tigaina i le tau faatulagaina o le auaunaga faafomai, ina ua aliali mai se teva a fomai i le tausaga e 2005, lea na faaitiitia ai ma alii ma tamaitai fomai e faia le tautua i le Matagaluega o le Soifua Maloloina.
O se faaletonu na aafia ai foi ma le auaunaga faatausi soifua ina ua to‘a gaogao le aufaigaluega i lea itutino tāua o le auaunaga faalesoifua maloloina o loo pulea e le Malo.
Ina ua tulai mai le teva a fomai i lea tausaga, o le alii fomai o Stanley Dean ma nisi o fomai sa mau pea lo latou fia tautua i le atunuu ma le Malo, ma e lei auai i le teva poo le strikle ina ua galulue faasoloatoa i le ao ma le po.
O le faavae lea o le finagalo o Stanley i le lē vaai mamafa o le PSC i le tāua o le tigaina, ae ua faamuamua tuuaiga e leai se faamaoniga. E faato‘ā manino le mata o le vai i tuuaiga faasaga i le faauluuluga o le National Health Service pe a mae‘a suesuega o loo faaauauina i le vaiaso nei.
O nai tausaga e lei mamao atu na oia ai foi le lotoifale o le Matagaluega o le Soifua Maloloina i ni faaletonu na tuuaia ai le pulega i lea vaitaimi ma nisi o le au faigaluega i le faaaogā faasolitulafono i ni auala piopio o tupe.
O nisi sa molia ai na faia moliaga faasaga ia i latou ma tulai ai i le faamasinoga ma faapea ona faasalaina ai i le falepuipui. O nisi sa tuuaia na faaleaogāina o latou moliaga ona ua lē mafai e leoleo ona tuuina atu ni molimau e lagolago ai.
