Faavae aloaia le Ekalesia Metotisi Fou a le Atua

O se tala e faateia ma fou i le faafofoga a le toatele o sui auai o le ekalesia tele a le Metotisi Samoa, o loo alala i soo se tulimanu o lenei kelope, ae mo le Ekalesia Metotisi Samoa, o lea ua amata aloaia nei se isi ekalesia fou ua vavae ese mai le Ekalesia Metotisi Samoa, ma ua ta‘ua nei o le Ekalesia Metotisi Fou a le Atua.
Ua talafeagai ai le ta‘u o le Metotisi i lenei ekalesia fou, ona o susuga i faafeagaiga na amatamea mai le fofoaina o lenei ekalesia fou, o i latou lava sa tautua ai muamua o ni faafeagaiga i le ekalesia Metotisi Samoa.
O le Aso Sa, aso 6 Iulai 2013, ua tusia nei i faamaumauga o lenei ekalesia fou, na tatala aloaia ai le latou uluai lotu, i Aukilani Niu Sila, e pei ona faia le sauniga lotu i Papatoetoe.
Na maua se faatalanoaga ma le susuga i le faafeagaiga sa taitaia le sauniga amata i le Aso Sa talu ai, Susuga ia Rev Petaia Setu, ma ia otooto ai le amataga mai o lenei faamoemoe e pei ona ua tino mai nei.
Saunoa Setu, o le tausaga lava e 2007 na amata ai ona malosi lava lona mafaufau i lenei suiga, ae sa lei iai se faatinoga vave, ona sa tuu atu mea uma i le Atua, ma tagi atu i ai i le ao ma le po mo lana taitaiga pe o se mea ua talafeagai pe leai nei lagona ua mamafa i lona loto.
E pei ona ta‘ua e le susuga i le faifeau, o le tausaga e 2007 na amata ai ona tuputupu a‘e ni lagona, ae sa taumafai lava e fesili i le Atua, ma talatalanoa foi i nisi o uso a faafeagaiga i ni o latou foi lagona; ma o le mea moni, saunoa Setu, e toatele faafeagaiga o le ekalesia o loo ioeina ma lagolago i lagona e pei ona amataina ai lenei ekalesia fou, ae mo nisi o i latou, e lē o faigofie ona faia i le taimi nei ni faaiuga maumaututū e savavali ese mai le taiala e pei ona auauna ai i le ekalesia tele, ae ma le mautinoa ua oo mai a latou faamanuia e tusa ai o le faamoemoe o le ekalesia fou, le Ekalesia Metotisi Fou a le Atua.
O le Aso Sa la na tea nei na uluai aloaia ai le amataina o le ekalesia fou lenei i Aukilani, ae saunoa Setu, o le tausaga talu ai, 2012, i le Aso Sa, aso 9 o Tesema, na faavae ai le latou uluai lotu i Samoa, ma sa faia lava i lona maota i Vaitele fou, ina ua oo atu le susuga i le faifeau malolo penisione mai Ueligitone, Susuga Silipa Mamea, ma la talanoa ma iloa ai, o lagona foi ia sa mamafa i le finagalo o lea foi faifeau malolo, ma la amataina ai loa le ekalesia muamua lea i Vaitele fou i le maota o Petaia Setu.
Ua iai foi se lala o lenei ekalesia fou i Cains i Auestalia, faapea foi se vaega o loo tau faamaopoopo i Melepone, ae mo Ueligitone, o lea ua faavae ai ma amataina lenei lotu Metotisi fou  e le susuga i le faifeau malolo manumalo, Rev Silipa Mamea.
E tusa ma le 11 aiga ua amata ai nei le uluai ekalesia fou i Aukilani, ma na molimauina e le sui o le nusipepa na auai atu i ai, le faatumulia o le mamalu o le ekalesia, o uo ma aiga sa latou molimauina lenei taeao fou i le ekalesia Metotisi, e pei ona ua iai nei se isi vaega ua vavae ese mai le ekalesia Metotisi Samoa, ae avea ma Ekalesia Metotisi Fou a le Atua. O le faavae o lenei ekalesia fou e pei ona saunoa Setu, “Ia Saoloto le Ola Tapuai a Tagata” o lona uiga, e lē toe faatinoa ni faiga e pei ona masani ai le ekalesia i mea e pei o Atinae a le ekalesia; e lē toe faia ni Faamati; e lē aoina se peleti ma fai ni alofa o le faifeau; e lē tau faia foi ni matafale; e lē faia ni Mafutaga a Tina poo Mafutaga a Tamā; ae o le a tapuai tutusa tagata uma.
O foai o le a faia mai le agaga fiafia ma le lotofuatiaifo ua malie e fai ai le foai, ma e tuu lava i le teutusi e aunoa ma se tau faalauiloa mai luga o le pulelaa pe faasilasila mai luma o le aofia. Na pau le mafuaaga o le a faamauina ai, mo le fuafuaga a le malo i le itu tau lafoga, ae lē ina ia iloa se aofaiga e faasilasila mai luma. E na o le pau le fuafuaga o le foai e fai, ina ia saili ai se totogi mo le nofoaga o le a faia ai sauniga lotu. E lē o iai foi se faanaunauga e fia fausia vave se malumalu tapuai, ae o le a faatino lava i maota poo hall e totogi mo le faia o sauniga seia oo ina toe faatulaga nisi fuafuaga ina ua mauaa lelei le ekalesia fou.
Tau ina ia iai faamanuiaga a le Atua i lenei ekalesia fou, a o taumafai ai e faatino a latou tapuaiga ma le lagona fiafia ina ia lagona e tagata lotu uma le naunau saoloto e fia tapuai moni i le auala o loo faafinagaloina mai e le Atua.