Amatamata mālie le Faletupe a le EFKS

O le mae‘a ai o le Fono Tele sa feagai ai ma le Ekalesia i le tausaga nei, o le isi lenei o mataupu sa lauliliu i ai le tofa a le Ekalesia.
Na faaalia e le Failautusi Aoao o le Ekalesia, Rev Iutisone Salevao e faapea, ua pasia le faamoemoe e le Fono Tele ma ona aulape ua mae‘a ona faataoto.
“O le amataga o lenei atinae o le a amata e lē o se Faletupe telē e pei o le ANZ ma isi ae o le a amatamata mālie lava e pei o isi atinae tau tupe o iai nei.
“O le faamoemoe maualuga lava, sei mata‘itū e le Ekalesia lenei ituaiga atinae ma lona gasologa. O le a mafai ona teu ai tupe a Aulotu faapea ai ma tagata lotu o le Ekalesaia.
“O le a mafai foi ona faia ai nonogatupe mo Aulotu faapea ai ma tagata lotu o le Ekalesia i se tului maulalo,” saunoa i ai Rev Iutisone.
Na ia faaalia foi e faapea, e lē o iai se faamoemoe tele o le Ekalesia e faamatuu atu lenei auaunaga mo le atunuu atoa ae o le auga lava o aute e mo le Ekalesia ma ona tagatalotu.
“E lata i le $10 miliona le teugatupe a le Ekalesia ua ta‘ua o le Toomaga, ua iai le faamoemoe o le a aumai ai se tupe pe $2miliona i le $5miliona e faagaoioi ai le atinae lenei.”
Faaalia e Iutisone o le taimi nei e lei mautu se nofoaga mo lea atinae ae o loo tilotilo lava i se vaega o le fale o le Ioane Viliamu e faatū ai.
“Afai lava e faatino ma tilotilo atu le Ekalesia e lelei ma sologa lelei i le umi e pei ona ou fai atu, o lona uiga ua fai loa se isi mea e lapoa atu.”
E lei mautu mai foi se igoa o le a faaigoaina ai lenei atinae a le Ekalesia aemaise ai o le vaitau o le a
tatalaina ai.