O le valaau a le Atua i le soifua galue ma le soifua auauna i lana galuega, tatou te lē iloa le taimi e tofia ai i tatou, ae o le Atua ua leva ona ia filifilia le tagata e tulai mo le tauaveina o lana talalelei.
O le filifiliga la a le Atua na tofia ai loa le susuga ia Peti Solomona ma lona faletua ia Lima Solomona e faaauau le tausiaina o le lafu mamoe i Otara ona ua iai le faamoemoe o le a malaga i Ausetalia le susuga i le taitai ia Kofe Luti ma le lona faletua ia Tesi auā le isi galuega o loo i totonu foi o lea atunuu.
O le Aso Sa ua mavae, 7 o Tesema na faataunuuina ai loa lea sauniga faapitoa i le malumalu o lea lava ekalesia i Otara. O le galuega lenei e 8 ona matafale ma sa amata mai i Magele a o lea ua sii mai i Otara.
O aiga na lua faapea susuga i faafeagaiga ma o latou faletua, o uo ma ē masani na faatasi uma atu i lea aso tāua mo le faaeeina o le tofi faifeau i le susuga ia Peti ma lona faletua ia Lima. E 5 tausaga o galulue lenei ulugalii i lalo o le taitaiga a le susuga i le taitai ia Kofe Luti ma filifilia ai loa mo le galuega a le Atua. Sa auai atu ai foi le isi lala o lenei lava galuega o loo i Papatoetoe lea o loo tausia e le susuga i le faafeagaiga ia Lutelu Niue ma lona faletua ia Ila Niue.
O se sauniga ma loimata auā foi ua ese le suiga o manatu ma lagona i lea laasaga fou o le soifuaga ua oo mai i ai le valaau a le Atua.
Na lagona le mamalu o le Atua ma le galue o lona agaga i loto o lana fanau, i le taimi na amata ai le sauniga lea sa taitai ai le susuga i le faafeagaiga ia Lutelu Niue.
O le faauuina o le susuga ia Peti ma lona faletua ia Lima na tulai ai le taitai o le ekalesia ia Kofe Litu e fai le faamalosiau mai le afioga a le Atua mo i laua auā le tausiaina o le galuega i Otara. Na saunoa le faafeagaiga, “Ia lua mataala, ma ua leva ona silafia e le Atua oulua o ni tagata mataala ma o le mafuaaga foi lena ua tofia ai oulua e faaauauina le galuega.”
O susuga i faafeagaiga sa valaaulia sa latou faaee atu uma o latou lima ma faapaia ia i laua. O loimata o le fiafia ma le faafetai i le Atua na maituina ai lea aso i le auvalaaulia sa molimauina lea faamoemoe.
Na saunia foi e le autalavou mai Otara ma Patoetoe faapea nisi o le auvalaaulia ni faaevagelia ma tala faatino e molimau ai pea le matagofie o le Atua i totonu o le ekalesia, aemaise o le faaula a tina ma aiga na faaulaina ai le susuga i le faafeagaiga ia Peti Solomona ma lona faletua ia Lima Solomona faapea nisi o susuga i faafeagaiga sa auai.
O upu tomuli o le aso na saunoa ai loa le tofa ia Palea Solofa e fai ma sui o aiga na lua e molimoli le agaga faafetai i le susuga i le taitai ia Kofe Luti ma lona faletua ia Tesi aemaise o susuga i faafeagaiga sa molimauina faatasi ma le auvalaaulia lea aso e tusa ai ma le faamoemoe ua faataunuuina ma le manuia.
Na sauinia foi e aiga na lua faaaloaloga faasamoa e pei ona masani ai le aganuu a Samoa ma faaiu ai loa i le faleaiga o le Buffet King i Manukau mo le taumafataga.
O le ekalesia lenei e lua ona lala o loo i Niu Sila nei, tasi o loo i Samoa, tasi Ausetalia ma le isi o loo i Tonga.
