Faauuina Monike Pauline

O le aso ananafi na faamavae atu ai aiga, o uo i se tamaitai e 25 tausaga le matua i le mae‘a o lona faauuga o se monike o le Monaseri i Samoa faapea ai ma Tonga. O le vaiaso fou o le a ia tuua ai le atunuu e malaga atu auā galuega i le monaseri i Tonga.
O lenei tamaitai na ia ta‘ua o lona olaga atoa na tuputupu a‘e i Vaoala e latalata i le nofoaga o Monike, ma o lona aiga e tautua e ala lea i le ofo atu o i latou ma ona tei e fai feau a monike ma teu le fanua aemaise o le auai i sauniga i lea nofoaga. O lona olaga atoa lava la na ia ta‘ua e leai lava se isi manaoga sa ia te ia nai i lo le avea ma taulaga a lona aiga ma tautua o se monike.
O se tamaitai e sau i se aiga e faamanuiaina e le Atua i le musika, o se alo faasino ia Peseta Ilalio ma lona faletua ia Taufaalili ma o le lona tolu lenei o tamaitai i se fanau e toaiva (9).
O lona ola aoaoina na amata mai lava i Sagata Maria i Savalalo ma faauma ai le aoga tulagalua i Vailima. Na mae‘a lea ona agai loa lea i le Kolisi o Avele ma avea ai ma Taitai tamaitai o le Aoga (Head Girl) i le tausaga e 2005. Na faaauau ana taumafaiga faaleaoaoga i le Vasega Fitu poo le Foundation Year i le Iunivesite Aoao o Samoa ae e lei mae‘a ae ua alu i Niu Sila ma galue ai loa mo le tausaga atoa.
O le toe foi mai la o Sister Pauline i le atunuu i le tausaga e 2007 na faamautu ai loa lona manaoga lea mai i le laitiiti e ofi atu i le Monaseri i aoaoga a monike ma faapea loa ona faatino.
O le tausaga e 2011 na faasalalau ai i totonu lava o le Monaseri avanoa e ofo atu ai le soifua o i latou e fuafua e faamonike ma i latou ua faauuina o monike e agai ai e amata le Monaseri i Tonga ma o iina na ofo atu ai loa le auaunaga a lenei tamaitai.
Na sau mai i Tonga ma sui o le ekalesia Katoliko i lea atunuu atoa ai ona aiga ua maua ai i lea foi atunuu ma na tumutumu uma lava i latou nei i le malumalu o Monike i Vaoala i le aso ananafi auā le molimauina o le sauniga paia e faauuina ai le tofi monike o Sister Pauline.
E maeu viiga o le sauniga aemaise le tuufaatasiga o le aiga o lenei tamaitai i ona mātua ma ona tuagane ma uso i le momoliga o le taulaga o viiga e faafetaia ai le taulaga tagata ua ofo atu mo le galuega a le Atua, ma o le mau foi lea a lona tamā ia Peseta Ilalio o se alii pese lauiloa o Samoa.
O lona afafine o le taulaga ua leva ona fuafua e le Atua ma e toe faafoi lava i le Atua e ana lana fanau le ola o lona afafine mo lenei galuega.
O Monike e pei lava ona silafia o le tele o le latou ola tautua i le lotu ma le galuega a le Atua ua ogatotonu i talosaga e faia i aso uma ma o le vaega lea o le galuega faafaifeau pe faaauauna a le Atua e faauuina loa agai loa i monaseri ma o nofoaga nei e lē toe tatala ai se avanoa e asiasi ai i aiga, ua nonofo lava i totonu o nofoaga nei ma feagai ma talosaga i aso uma. O le taulaga foi la lenei e ofo atu lava e lē toe foi mai i aiga.
E ese le fiafia o le tamaitai i lona faauuga ma o ona mātua na vaaia lava le iai o taimi na ootia ai agaga ma faaali i loimata ae na malosi lava le fiafia o loo aumai e lenei tamaitai ma vave ona mou atu ni foliga faanoanoa o i latou sa iai ma feiloai atu i lenei tamaitai.
O lana faamatalaga o le agai i Tonga o le a faapea ona faalautele ai lana auaunaga ma ua tolu tausaga o i lea nofoaga ma ua lelei foi le tautala ai i le gagana, ona pau lea o se luitau na feagai ma ia i le faato‘ā oo atu ai i lea atunuu.
O Sister Pauline ua faaopoopo nei i tamaitai Sa o le ituaiga o Monike ua galulue nei i lea atunuu ma e aofia ai foi nisi o alo o le atunuu ua tuufaatasia ma isi tamaitai monike o Tonga ma isi atunuu.  O loo galulue atu Samoa nei i ni sailiga seleni auā le faatupega o le fausia o le Monaseri i Tonga ma o se galuega ua faagasolo i lenei tausaga.