O Aperila o le tausaga e 2009 na faia ai se faaiuga a le Kapeneta i le faamuta o le toe ave o ni pagota e tuli faasalaga i tua ae lē aofia ai pagota e tuli faasalaga i le Ao o le Malo, Minisita ma le Sui Ao. O le faaiuga foi lea na aiaia ai le tatau ona toe momoe atu i le falepuipui o pagota o loo galulue i tua.
O le alii leoleo satini sinia o Kerisiano Lale o se tasi o loo galue i le falepuipui i le vaega o le vaaia o galuega o aso taitasi poo le administration. Sa faia lana molimau i luma o le komisi ma ia tuuina atu ni faamaumauga tāua mo le silafia e sui o le komisi suesue. O le tasi o ia faamaumauga o faaiuga a le kapeneta mo pagota e galulue ma nonofo i tua faapea pagota mo le Ao o le Malo.
O le tuliloaina o le alii leoleo satini sinia na fesiligia ai mo sana tali pe aisea o loo ave ai pea pagota e tuli faasalaga i nisi o leoleo sinia, le minisita o le matagaluega o leoleo pe a fua i se tasi o aiaiga o le faaiuga a le kapeneta i le masina o Aperila o le tausaga e 2009 o loo ta‘ua ai, a uma loa pagota o loo i tua i le taimi lea ia faamuta ai loa, seia vagana pagota mo le Ao o le Malo, le minisita ma le Sui Ao.
Na tali Kerisiano e leai sona silafia i lea tulaga ona o faaiuga uma e faia e le pulega o le matagaluega le executive lea e aofia ai le Komesina ma ana komesina lagolago.
O nisi foi faaiuga e sau sa‘o lava mai le Minisita o le matagaluega. O le toe momoe atu i totonu o pagota e pei ona iai le faaiuga lea a le kapeneta, na ta‘ua e le leoleo satini sinia e lē o iai se tulaga faapea o iai, auā o loo faamautu lava i tua i aiga o leoleo sinia o loo tuli ai faasalaga o ia pagota.
O se isi lea itu lelei e pei ona saunoa le taitaifono o le komisi suesue le afioga Maiava a o faagasolo le molimau a Kerisiano, ona sa ia matauina i le latou asiasiga le feoma‘i ma pumoomoo avanoa o sela o loo nonofo ai pagota. Na ia faaalia e sili atu lea e maua ai se avanoa mo ia potu auā isi pagota, nai lo le toe momoe atu i le falepuipui o lona uiga o le a lē ofi ona faigata lea o le galuega a leoleo o le falepuipui.
O le iloiloina o pagota e Aso Sa i tua na faaalia e le leoleo satini sinia, e ono masina e tuli ai le faasalaga o se tagata nofosala e tasi le tausaga ma masina ona iloilo lea, ae o latou e i lalo ifo o le ono masina mo le itupa o alii e iloilo e le pulega ma faia i ai se faaiuga.
O pagota tamaitai e leai se tapulaa o masina e tuli ai le faasalaga ona Aso Sa lea i tua ae fuafua lava e le pulega. O lona uiga e vave maua e tamaitai pagota le avanoa lea nai le itupa o alii nofosala.
E toaiva nisi o loo nofosala soloatoa i le falepuipui i le taimi nei ae o loo faaalia i faamaumauga sa tuuina atu e le alii leoleo sinia, o loo pou i tua mai o le falepuipui. Sa fesiligia pe aisea, ae na tali Kerisiano e fuafua lava e le pulega pe afai ua saogalemu aiga na aafia o latou tagata pe a alu i tua se tasi o loo nofosala ai ona o le faia o sea solitulafono e pei o le tose teine, ma le fasioti tagata faamoemoeina.
Sa fesiligia le alii leoleo satini sinia ona o le fia silafia e le komisi poo ā mafuaaga e ave ai pagota soloatoa e tuli faasalaga pe pou i tua, ae pe iai ni puipuiga mo i latou. E lua vaiaso o loo malolo ai le komisi suesue e faato‘ā toe tauaofia i le aso 15 o Oketopa pe a mae‘a le aso malolo o le lotu a tamaiti.
