Bachelor of Arts, double major in Criminology and Sociology
Ua lē masino filifiliga ma iloiloga a alo ma fanau o si o tatou atunuu e filifilia ai ituaiga mataupu eseese e mafai ona ausia i le malosi, le poto ma le tomai auā ua matuā tele lava avanoa mo aoaoga i totonu o Iunivesite eseese i Aotearoa nei. O se fiafiaga ma se mitamitaga sili lava lea auā ua toatele foi nai o tatou tagata ua tausinio ma tauivi i totonu o Iunivesite ma faamanuiaina ai. O le vaitau foi o seleselega auā leaga lava se mea manaia ma le matagofie o le faaeaina.
O le tamaitai o Alice Alisa Taupule o le isi foi lea alo Samoa ua faaeaina ma faamanuiaina mai ana taumafaiga faaleaoaoga i totonu o le Iunivesite i Aukilani ma ua ia umia ai le tusipasi faapitoa o le Bachlor of Arts, Double Major in Criminology & Sociology. E tolu foi tausaga sa tauivi ai lenei alo ma o lea la ua ia tauaaoina lenei tusipasi faapitoa auā le sailiga o se galuega mo le lumanai.
O le tamaitai o Alice Alisa o le alo o Letoa Taupule ma Lomia Taupule, ma na faaalia le loto fiafia tele ma le agaga faafetai o mātua, na faailoa mai foi o laua lagona mitamita e faafoi ai le viiga ma le faamanū i le Atua auā ua tinipa‘ō nei le uto ma ua tau lau o le faamoemoe o si o laua alo auā sa lei faigofie foi a o lea ua tali mai lava le Atua, faafetai.
Ia Alice Alisa Taupule, malo le tauivi, malo le onosai faafetai le saili malo mo lou aiga aemaise o nai ou uso ma tuagane mo a latou foi taumafaiga ina ua e faataatia le alafua mo i latou foi mo le lumanai. Ia o alofaaga ma faamanuiaga mo oe ia alofagia lou soifua talavou ma lou faailoga ua maua ia mafai ai ona e aapa atu ma fesoasoani i tagata lautele e ala i se galuega o le a faamanuiaina ai oe.
