Aofia Samoa i malosiaga fou

O se tasi o vaega tāua o se fono tele a le Pasefika na usuia i Fiti mo le faatalanoaina o malosiaga fou, o le sainia lea o se maliega mo ia malosiaga lea e $2 miliona tala Fiti lona tau atoa.
O se maliega lenei na sainia i le va o le Ofisa o le Siosiomaga o le Pasefika le SPREP ma le Polokalame o Fesoasoani a Malo Aufaatasi mo malo laiti.
O le tupe lenei na maua mai i le malo o Denmark ma e faaalu i atunuu eseese o loo faatino a latou galuega mo le sailiga o malosiaga nei e sui ai le tupe tele a le Pasefika o alu i le tau faatauina o le suauu auā le ola ai o le eletise ma le tele o isi manaoga. E lima tausaga o lenei polokalame ma e 11 atunuu o le Pasefika e aofia ai Samoa o le a maua lenei fesoasoani.
E ui o lea ua faamauina e na o le 0.03% o le faaleagaina o le lalolagi i kasa oona e sau i atumotu o le Pasefika, ae o le tasi lenei vaega o le lalolagi ua matuā aafia lava ona o suiga ogaoga o le tau, ma o le mafuaaga lea o le taumafai lava o atumotu uma ina ia saili auala e taofiofi ai le maualuga pea o aafiaga o suiga ua vaaia nei i le siosiomaga.
O se tasi la lenei o auala ua savalia e atumotu o le saili o isi auala e maua ai malosiaga e mafai ona latou faaaogāina e pei o le malosiaga o le lā e mafai ona aoina ma faaola ai le eletise. E lē gata i lea o malosiaga o loo maua mai i le savili ma le suavai.
O Samoa o loo faaaogā ma faataitai foi malosiaga o loo maua mai le suauu o le popo ma ua faaola ai nisi o taavale ae e lei mae‘a lelei lava nei suesuega i le taimi lenei. Ua agai foi Samoa i le faalautele ai o eletise e maua mai i le malosiaga o le lā.
Faaalia e le Alii o loo faauluulu i ai le UNDP le polokalame fesoasoani lea a Malo Aufaatasi, o le taumafaiga lenei o le a tele le fesoasoani i atumotu laiti e faitau miliona tala e alu i tausaga taitasi e faatau mai ai le suauu i fafo.         E lē gata i lea ua mafai ai foi ona ta‘u atu i le lalolagi e ui i le laiti o nei atunuu, ae lē o taofia ai le taumafai malosi e fai se galuega ina ia taofia ai le tele o aafiaga o le lalolagi i suiga o le tau e mafua mai ona o galuega a le tagata ua matuā faaleagaina ai le siosiomaga.