O le Aso Lua na faataunuuina ai polokalame o Faauuga o i latou uma ua mae‘a tauiviga ma suesuega faaleaoaoga i soo se matata i le Manukau Institute of Technology.
Sa maitauina ai foi le toatele o nai alo ma fanau, o tupu ma tamalii o si o tatou atunuu aemaise foi o sui mai isi motu o le Pasefika sa faamanuiaina ai i lea faamoemoe faifai pea i tausaga taitasi.
“Auā sa galue punouai mo se tali faafiafia loto ma le faaea aiga, lea la ua iai le loto faafetai ma le agaga faamanū i le Atua, ina ua a‘e manuia mai le faiva o le tautai ua atoa ai tino o le tama. Malo le tau! Malo le toa Iliganoa Michelle Faamausili”.
O le faailoga o le Diploma in Travel and Tourism lea ua faauuina ai nei le tamaitai talavou o Iliganoa, ma sa faapena foi ona auai atu ona aiga e talia lelei le taumafaiga i lea aso ina ua a‘e malo, faafetai! Ia manuia tele le lumanai ma au fuafuaga i se galuega o le a faamanuiaina ai oe e le Atua ma ia maua le faamaoni.
Alofaaga ma Faamanuiaga mo oe mai ou aiga uma lava i soo se tafa o le lalolagi, o lou nana o Amitunai Laasaga Faamausili, o ou aunties ma uncles ma o latou aiga, ae sili faamanuiaga mo oe mai ou mātua peleina: Saveasoi Leitupoese ma Leuila Faamausili ma le fanau i Samoa.
