Ua fatuina e le Atua le aiga o Emmanuel ma Joanne

O ni upu e sili ona matagofie ma faamalosiau, i le tamaitai faatoanofo tane o Joanne ma le alii faato‘ā faiava o Emmanuel, na saunoa i ai le faafeagaiga fai faaipoipoga o Pastor Komisi Lealaimisa.

O le taeao o le Aso Toonai, na tuufaatasia ai i laua i le alofa o le Atua, ua o se aiga e tasi, i le malumalu o le Ekalesia Assembly of God i Kingswood.

Ua sausau fia lele le manu nai utufiu, auā o aso faapenei e momoo ma saafiafi i ai mātua, aemaise le tamā o se tamaitai faaipoipo, o ni faagaeetiaga foi poo le faaea aiga pe a faapaiaina faapenei. Ailoga e aunoa se aso tele ma ni loifofoga o le fiafia, auā tatou te naunau uma ia iu lelei a tatou fanau, aemaise le itupa o tamaitai.

Atonu o lagona ootia ifo ia o tuaa o le tamaitai faaipoipo, a o la molimoli atu si o laua alo e amataina lona olaga fou, o le fatu aiga. Amuia le ulugalii fou, ona ua faavae le aiga i le Atua, ua poutu ai o la olaga talavou, ma pola puipuia ai mai matagi o faaosoosoga ma vasa o fesouaiga.

Ona e lē gata i le susū o le susuga i le faafeagaiga fai faaipoipoga, ae na faapea ona faaee aao o le au faigaluega paia a le Atua mai ona fata faitaulaga eseese, e faapaiaina i laua.

E pei ona auai le Sui Taitai o le A.O.G, Aperaamo Nanai ma le faletua o Selepa, Moli ma Ruta Luatua, Tagatavao ma Meli Tito, Sagale ma Faiupu Tuilaepa, Fetalaiga ma Tina Faalaga.

O le tamaitai o Joanne, o le alo ulumatua e faasino i le fetalaiga ia Vaasilifiti Tafao ma le tausi o Pelepesite Tamasone mai alalafaga o Fogapoa Tuasivi ma Lepa.

O Emmanuel Siamani o le alo o le afioga ia Nanai Sootaga, ma Theresa Nonu o le afioaga o Falelatai.
E toafitu alii ma tamaitai, o aiga ma uo mamae a le ulugalii fou, faapea foi le au ave fugalaau e toafā na filifilia e i laua e lagolagosua i lo laua aso tele.

Matagofie sauniuniga a aiga na lua e amata mai lava i le malumalu, aemaise le nofoaga o le Bowman Hall lea na faia ai le taumafataga.
O upu o le tusi, ia a‘oa‘o le tama e tusa ma ona ala, a matua e lē toe tea ese ai.
O totonu o aiga aemaise mātua, o faiaoga muamua ia, o lona uiga o le alii talavou na avea ma fofoga o le aso poo le pule o le tausamaaga na lelei lona a‘oa‘oina.

E ui ina e na o le 19 tausaga o le soifuaga o Joseph Aila‘ula‘u Namulauulu Laulilii, ae na logo mālie le faafofogaaga ma silamio le mamalu lasilasi, ona e ui ina ititi ae maini.

O le afioga i le Sui Taitai o le Ekalesia A.O.G, Pastor Aperaamo na faapaiaina le taumafataga, na gaseseina e le au kuka lalelei ma le tausaafia.
O le fetalaiga ia Namulauulu Patolo Leva Setu, o se tasi o faleupolu ua iloga foi i upu a le atunuu i Ausetalia, na malo toga, poo le sui foi o paia o aiga na lua, na tootooina faaaloaloga faaleaganuu, i tu ma agaifanua ua tatou masani ai.

Na matuā maualuga faaaloaloga na maamaau i ai auaiga o le ulugalii fou, ona e ui ina paeloa le faamoemoe i ma‘ave eseese, o le atunuu, susuga i faafeagaiga aemaise le toatele naua o faleupolu, ae na tofusia uma i le faasoa.

E pei o upu faatomua a le fetalaiga ia Namulauulu, ana leai Ieova, e lē taunuu le faamoemoe. Faafetaia le alofa o le Atua, ona ua fatuina e le Atua le lua aiga Emmanuel ma Joanne.