E to‘a 18 sui sinia o Ofisa o le Malo o Samoa na faauuina i le faauuga a le Iunivesite o le Pasefika i Saute na faatautaia i Apia i le faaiuga o le vaiaso na tea nei. O le taimi muamua lea ua toe iai se aufaauu faapea ua tauaveina aoaoga faaopoopo i le pulea lelei lea o ofisa o le malo o loo auauna ai.
O se aoaoga na faatupe i tausaga ua tea e le Malo peitai e lei leva ona faatamoe ae taofia loa. O le leai lava o se seleni e faagasolo ai ma o le aoaoga muamua lea ua toe faatautaia nei sa faatupe i lalo o le fesoasoani a le malo o Ausetalia.
O le faaaliga mai i le Komisi o Galuega a le Malo, PSC, o le a taumafai lava ina ia mafai ona maua le fesoasoani faaauau a le Malo o Ausetalia e faatino ai lenei aoaoga ua una iai le auaunaga a tagata faigaluega a le Malo o Samoa.
O le afioga Mataafā Dr Desmond Amosa na faiaoga ai i lenei aoga e pei ona faatamoe i lalo o aoaoga tau pulega o pisinisi ma le tamaoaiga a le Iunivesite o le USP i Alafua ma na ta‘ua e le alii Taitaifono o le Komisi o Galuega a le Malo, le fetalaiga Tuuu Dr Ieti Taule‘alo, e aogā tele le faamalosiau i galuega faatino a sui sinia o le Malo, e ala i le iai o aoaoga e saga unai ai le tomai aemaise i le itu tau i le fausia o fuafuaga ma faiga faavae o ofisa o le malo, le faaleleia o le auaunaga lautele i le mamalu o le atunuu ma le taumafai lea ina ia faaauau le sailiili i totonu lava o galuega.
O le isi itu tāua na ta‘ua e Tuuu o le faia lava lea i Samoa o nei aoaoga e aunoa ma le tau saili o ni avanoa faasikolasipi ma tau malaga ai i latou nei i fafo e faatino ai auā o le a motusia ai le auaunaga o loo faagasolo lava i le taimi e aoaoina ai sui ua filifilia o ofisa eseese o le Malo.
Ta‘ua e le Hai Komesina o le Malo o Ausetalia, le susuga ia Susan Langford, e tāua tele ia Ausetalia le vaaia o le agai i luma o le auaunaga a ofisa o le malo ma o se auala sili lea ona lelei e tino mai ai le faanaunautaiga e pei ona ta‘ua.
Faaalia e lenei tamaitai o se avanoa lē aumaua auā o le tomai i pulega o ofisa ma le faatamoega o tautua e tatau lava ona maualuga le faatinoga ma o le mafuaaga lea o le lagolago a lona malo.
O le tamaitai o Veronika Schuster Levi lea sa faapea ona saunoa e fai ma sui o le aufaauu o le tusipasi lea o galuega a le Malo, ma ia faapea mai e manaia foi le fesootaiga o lenei aoaoga ma le Iunivesite o le Pasefika i Saute auā e ui i le tele o avanoa faapenei ua maua i Samoa, e lē mafai ona agai atu se isi i fafo ma le tusipasi lenei ma faaaogā ai i nofoaga e pei o Niu Sila ma Ausetalia ae o le fesootaiga lenei ma le USP ua tatala ai lea avanoa o le talia i fafo o tusipasi, tipiloma ma tikeri ua aoaoina ai le toatele i lea Iunivesite.
O le tatalo a nei sui faauu, ina ia mafai ona faaauau le lagolago a le Malo o Ausetalia i lenei aoga ma ia toatele nisi sui o ofisa o le Malo e faamanuiaina ai. O le vasega o le aufaauu ua manino e toatele tamaitai ua umia tulaga maualuluga o ofisa a le malo, lea e to‘a 14 tamaitai faauu ae toafā alii.
